25 urte Brasilek egindako bisitatik

1998ko maiatzaren 31an, ikusmin erraldoiaren baitan, Athleticek Brasilgo selekzioa jaso zuen Katedral zaharrean. Klubaren mendeurrena goratzeko ekitaldien baitan, aste batzuk beranduago, frantziar Estatuan lehiatzekoa zen munduko kopan koroa defendatu behar zuen taldea gonbidatu zuen Athleticek. 

Ligako bigarren postua eskuratu eta, ondorioz, Txapeldunen Ligan aritzeko txartela lortu ostean, familia zurigorriak ilusio handiarekin bizi izan zuen Ronaldo, Bebeto, Roberto Carlos, Rivaldo edo Cafú bezalako izarren etorrera. Zalegoak, lagunarteko norgehiagoka bat baino, ekitaldi historiko gisa hartu zuen partida. 

Jendez lepo zegoen San Mamesen, Luis Fernandezek honako hamaikakoa zelairatu zuen: Juanjo Valencia atepean; Mari Lacruz, Mikel Lasa, Patxi Ferreira eta Carlos Garcia atzekaldean; Txomin Nagore, Josu Urrutia eta Bittor Alkiza zelai erdian; Javi Gonzalez eta Jorge Perez hegaletan eta Jose Angel “Kuko” Ziganda aurrelari moduan. Bigarren zatian, Imanol Etxebarriak, Isma Urzaizek, Jose Mari Garciak, Aitor Huegunek, Mario Bermejok eta Sendoa Agirrek ere minutuak izan zituzten. Parean, Mario “Lobo” Zagalho teknikari beteranoak gidatzen zuen Brasilgo selekzioaren hamaikakoan Taffarel, Cafú, Aldair, Junior Baiano, Roberto Carlos, Doriva, César Sampaio, Giovanni, Rivaldo, Bebeto eta Ronaldo aritu ziren. Ondoren, Zé Carlos, Leonardo, Edmundo eta Denilson zelairatu ziren.

Partidaren nondik norakoei dagokionean, Carlos Garcia durangarrak Athletic aurreratu zuen hemeretzigarren minutuan. Baina, atsedenaldiaren ostean, Futbol Club Barcelona taldean sekulako maila eskaintzen ari zen Rivaldok lehia berdindu zuen. Historiarako geratu den partidak 25 urte bete ditu jada.