Atepeko izarren maisuaren erretiroa

55 urtetan zehar futbolarekiko lotura estua, Athletic Clubekin hertsiki harremandua, Pello Agirreoak eskularruak definitiboki eskegi ditu. 69 urte betetzetik gertu, ondarroarrak erretiroa hartuko du, futbolari zein teknikari moduan egindako ibilbide luze zein oparoaren ostean. Agurraren atarian, Lezamako lankideek zein Klubaren gizonezkoen egiturako atezainek aitortza egin zioten Agirreoari, guztiek ohorezko korridorea osatuz. Amaieran, Jose Angel Iribarrek besarkada estu batekin jaso zuen, ondoren bere elastiko beltz mitikoa emateko. Bien arteko harremana aspalditik dator, izan ere, 70eko hamarkadaren bukaerak ondarroarrak zarauztarraren lekukoa hartu zuelako San Mameseko atepean. Euren ondarea, sinbolikoki zein profesionalki, hamarkadetan zehar luzatu da, gaurdaino. Horiek horrela, Unai Simonek, Julen Agirrezabalak eta Ander Iruk, 2022/2023 denboraldiko lehen taldeko atezainek, Lezamako haztegian euren maisu izandako Agirreoari kamiseta bana eskaini zioten. 

Ondarroako hondartza eta zelaietatik, Lezamako harrobirako jauzia eman zuen Agirreoak, Athletic Cluben beheko mailetatik igaro eta lehen taldera salto egin arte. Koldo Agirreren eskutik, Madrilgo Vicente Calderon estadio zaharrean, debuta egin zuen 1979ko maiatzaren 15ean. Ondoren, Helmut Senekowitsch austriarra entrenatzaile izandako garaian, jarraitutasun handiagoa izan zuen, beti Jose Angel Iribar ordezkatzeko lan eskerga aurretik zuela. Agirreoarekin batera, Andoni Cedrun, Carlos Melendez edo Jose Miguel Garita bezalako atezainek, zarauztarraren lekua hartzeko tenorean egon ziren. Baina, azkenik, Andoni Zubizarretak postua bereganatu zuen. Ondorioz, ondarroarrak bestelako bide batzuk hartu behar izan zituen, Elche CF, Club Deportivo Tenerife, Linares CF edo Deportivo Alaves bezalako taldeen koloreak defendatuz.

Ateetatik aulkitxoetarako bidea egin zuen Agirreoak. Besteak beste, Bermeo Futbol Taldea, Barakaldo CF, CD Logroñes edo CF Palencia zuzenduz, Athletic Cluben egituran sartu arte. Basconiako entrenatzaile gisa sei urtetan zehar aritu zen, 2006 eta 2012 bitarte, ondoren Klubeko harrobien prestakuntzako ardura hartzeko. Lanaren fruituak oso esanguratsuak izan dira, azken hamarkadan Athletic Cluben haztegitik aterarako goi mailako atezainak horren lekuko izanik.

Ondarroan jaiotako atezainen zerrenda luze eta oparoko kide, Agirreoarekin batera, haren herrikide diren Iñaki Bergarak, Kepa Arrizabalagak edo Oinatz Aulestiak ere elastiko zurigorria jantzi dute eta Jesus Larzabalek edo Eñaut Zubikaraik ere bide luzea egin dute bestelako taldeetan. Orain, Lezamako egunerokotik aldenduta, atepeko izarren gidariak, berriro ere bere herriko kresal usainaz gozatu ahal izango du.