Euskal Non-League Day: Leioa eta Leioako Emakumeak

Leioa Kirol Elkartea da Euskal Non-League Day txapelketan bere bi taldeekin (gizonezkoena eta emakumezkoena) parte hartzen duen klub bakarra. 1925ean sortua, gorri-urdinak Bizkaiko oinarri-futbola ahalik eta modu benetakoenean ordezkatzeagatik nabarmentzen dira, Lagun Artea Futbol Eskolak berrogeita hamar talde inguru eta 700 jokalari baino gehiago prestatzen baititu.

Euskal futbolaren jatorriak harreman estua du Leioako udalerriarekin; izan ere, Lamiakoko zelaietan jokatu ziren lehen partidak XIX. mendearen amaieran eta XX. mendearen hasieran. Hain zuzen ere, Lamiako SD Leioako lehen etxea izan zen bere sorreran, 1925ean. Lehen hamarkada hartan eskualde mailan jokatu zuen, eta Gerra Zibilaren agerpenak kluba 1949 arte desagertzea eragin zuen, non lehiaketara itzuli zen. Eskualde-kategorietan izandako ibilbidea gorabehera askorekin mantendu zen (eta beste geldialdi bat 1965 eta 1974 artean) 2008ra arte, orduan lortu baitzuen lehen aldiz Hirugarren Mailara igotzea.

Kluba Sarriena zelaian finkatu ondoren, Leioak bere historiako arorik arrakastatsuena bizi izan du; izan ere, David Movilla entrenatzailearen eskutik, 2014-15 denboraldian Bigarren B Mailara igotzea lortu zuen. Azken denboraldian, 2022-23an, Leioak azken unera arte 2. RFEFko mailara igotzeko lehian egon zen, Kanarietako San Fernandoren aurkako play-off-en luzapenean galduz.

Euskal Non-League Day jardunaldian, igandean, Leioako Emakumeak Pauldarrak FKT taldearen aurka neurtuko ditu indarrak, 15:30etan, Sarriena zelaian, eta Leioak Errenteriako Touring-en aurka jokatuko du, 17:30etan. Euskal Non-league Day-n jokatuko diren gainerako partidetan bezala, partiden atsedenaldietan Athleticeko lehen taldeen elastikoen zozketa egingo da, baita datorren asteburuan San Mamesen Cadizen aurka jokatuko den partidarako bi VIP sarrerena ere.

SD Leioa eta Athletic Clubeko elastikoak jantzi dituzten jokalari historikoen artean, Placido Bilbao, Sabino Bilbao, Jonas Ramalho eta Borja Agirretxu agertzen dira.

Leioa Emakumeen Taldetik Leioako Emakumeak taldera

Leioako Emakumeen Taldea, Iñigo Juaristiren aginduetara, euskal futboleko emakumezkoen talde garrantzitsuenetako bat izan zen, eta Athletic Clubeko emakumezkoen lehen taldearen sorreran hartu zuen parte. Leioako herria, eta lehenago aldameneko Sondika, bi udalerri erabakigarriak izan ziren XX. mendearen amaieran eta XXI. mendearen hasieran emakumeen futbola sendotzeko eta hazteko. Lehen talde gorri-beltz historiko hartatik sortu ziren 2002-03ko Athletic Clubeko jokalari gehienak. Talde horrek, elitean egin zuen lehen urtean, Superligako titulua irabazi zuen. 17 jokalari historia zuri-gorrirako: Arantza Andres, Irantzu Castrillo, Silvia del Val, Eba Ferreira, Izaskun Gaztelu, Jessica Gomez, Ana Belen Nuñez, Saioa Gonzalez, Julene Guarrotxena, Iraia Iturregi, Uguzne Mezo, Nerea Onaindia, Arrate Orueta, Vanessa Rodriguez, Lorena Sanchez, Aitziber Juaristi eta Nerea Uriagareka.

Leioa ET taldea Leioa Kirol Elkartearekiko independentea zen arren, 2003an Leioako Emakumeak sortu zenean eragina izan zuen, zalantzarik gabe. Formakuntza da oraindik ere eskola klub honen ezaugarri Nagusia; bertatik Athletic Clubeko jokalari hauek igaro dira: Naiara Beristain, Eider Hidalgo, Joana Flaviano, Eztizen Etxebarria, Ane Landa, Andere Leguina eta egungo Athletic Clubeko batzordekidea den Garazi Unibaso.