Nahikarik eta Sanadrik Athletic Clubekin debuta egin dute

CD Wandan egindako ligako estreinaldiak utzitako albiste onetako bat bi jokalari berriren debuta izan zen. Marta Sanadri, titular gisa, eta Nahikari Garcia, bigarren zatian, Athleticeko elastikoarekin aritu ziren lehen minutuetan. Ezin izan zuten garaipenarekin ospatu, baina biek ala biek duten talentu handiaren distira utzi zuten.

Marta Sanadri aukeratu zuen David Aznarrek erasoko erreferentzia izateko lehiaketa erregularreko bigarren jardunaldian. Donostiarrak 58 minutu jokatu zituen, eta presio-lan handia egin zuen aurkariaren atzealdean. Sanadrik nabarmendu zuenez, "pozik nago lehen minutuak jokatzeagatik, baina emaitza ez da espero genuena izan. Talde ona gara eta hurrengo erronketarako prestatzen jarraitu behar dugu".

Hain zuzen ere, Nahikari Garciak ordezkatu zuen Sanadri norgehiagoka erasoko puntan amaitzeko. Añorgakoak ere aurkariaren atzealdea estutu zuen eta markagailua murrizteko abagunea izan zuen. Hala ere, Lola Gallardok gelditu egin zuen bere saiakera eta ezin izan zuen golik sartu bere debutean. Honako hau izan zen erasotzailearen balorazioa partidaren amaieran: "Ondo lehiatu gara eta hori garrantzitsua da aurrean genuen aurkaria kontuan hartuta. Ausartak izan gara eta ondoen geundenean golak jaso ditugu. Hauxe da jarraitu beharreko bidea".

Arlo pertsonalari dagokionez, Nahikari pozik agertu zen bere debutarekin: "Oso pozik nago. Hainbeste hilabete jokatu gabe egon ondoren berriro futbolari sentitzeko gogo handia nuen. Ahalik eta lasterren sartu behar dut taldearen dinamikan. Ondo ari gara lanean, giro bikaina dago eta hori beti da oso garrantzitsua".