João Pinto: "One Club Man saria jasotzea sekulako poza da"

"Sari hau jasotzea poz handia da, eta oso eskertuta nago Athletic Clubekin, nire burua aintzatesteagatik". João Pinto, FC Portoko jokalari mitikoa, pozik agertu da San Mamesen, One Club Man 2023 gisa komunikabideen aurrean egindako aurkezpenean.

Jokalari ohi portugaldarra 16 denboraldiz aritu zen Dragoi Urdinetan eta klubaren historian partida gehien jokatu dituen futbolaria da, 587 neurketekin. Pintok onartu duenez, gaur egun "zaila da nirea bezalako kirol-ibilbide bat egitea, beti talde berean. Oso zaila da klub berean urte askoan jokatzen duten jokalariak izatea. Gaurko futbola duela hogeita hamar urtekoaren desberdina da eta jokalari onak beti leku berean egotea zaila bihurtu da".

Pintok 80ko hamarkadako Athletic ekarri du gogora, bera oraindik jardunean zegoenean: "Klub desberdina zen eta izaten jarraitzen du, bertako jokalariekin bakarrik jokatzen duelako. Garai hartan titulu garrantzitsuak lortu zituen, Clemente aulkian zela FC Barcelona eta Real Madrid bezalako aurkarien aurka jokatutako bi Ligak kasu. Horrek oso ondo hitz egiten du Athleticen balioei buruz".

Defentsa portugaldarrak Jose Angel Iribar izan zuen lagun aurkezpen ekitaldian. Zurigorriz jantzitako partida gehien jokatu dituen Athleticeko jokalaria da Iribar eta berak emango dio saria gaur arratsaldean Athletic Club-Getafe partidaren atarian, San Mamesen. Gainera, Jon Berasategik, talde zuri-gorriko zuzendari nagusiak, portugaldarraren irudia goraipatu du sari honen bidez: "Athletic Clubentzat ohorea da João Pinto hemen edukitzea eta saritzea. Sari honi buruz hitz egiten dugunean, ez gara klub bereko ibilbide bakarrez bakarrik ari, baizik eta atzean dauden balioez ere: leialtasuna, konpromisoa, kiroltasuna eta errespetua. Pintok eta Athletic Clubek partekatzen dituzten balioak".