"Egiten ari garen bidean sinesten dugu"

David Aznar Athletic Clubeko teknikaria komunikabideen aurrean agertu da gaur arratsaldean Lezaman, taldea bihar Bartzelonara abiatu aurretik. Lehoiek ligako hirugarren jardunaldia jokatuko dute Levante Las Planasen aurka (igandean, 17:00etan).

Entrenatzaile zuri-gorriak nabarmendu duenez, "asko aldatu zitzaigun lehiaketa hasiera. Granada CF igo berriaren aurka debuta egingo genuen etxean, eta Txapeldunen Ligan sartzeko faboritoetako baten etxean hastea egokitu zitzaigun. Hasiera arraro samarra izan da, baina irteera honi gogotsu ekingo diogu".

Athleticek porrotarekin estreinatu zuen denboraldia Atletico de Madriden zelaian, eta ikasturte hasiera honetan denboraldiaurreko sentsazio onak berretsi nahi ditu. Gainera, erizaintza, pixkanaka, husten ari da, iraupen ertain edo luzeko lesioak dituzten jokalariak izan ezik. "Jendea berreskuratzen ari gara eta oso pozik gaude 22 jokalarirekin entrenatzen ari garelako eta igandean aurkituko dugun testuingururako onenak direnak aukeratuko ditugu", azaldu du Davidek.

"Ez dugu haien jokoan sartu behar"

Aurkariari dagokionez, David Aznarrek talde kataluniarraren aurka jokatuko duen lehen aldia izango da. "Zelai zaila da eta asko estutuko gaituzte. Ligari ondo ekin zioten hiru punturekin. Ahalik eta gehien exijituko digute, baina indargune asko ditugu irabazteko. Joko zuzenaz, erorketez eta trantsizioez apur bat abusatzen duen taldea da. Joko horretan ez sartzen saiatuko gara, haiek gu baino hobeak izango baitira joko trabatuago horretan. Baloiarekin dominatzaileak izan nahi dugu eta oso kontzentratuta egon behar dugu. Irabazten eta talde oso serio baten aurrean ausartak izaten saiatuko gara jokoaren une guztietan. Lehiakorrak izan behar dugu 90 minututan zehar".

Azkenik, Lezamako eguneroko lanaz baikor agertu da. "Jokalariak oso kontzentratuak eta biziak ikusten ditut. Konfiantza handia dut taldearengan, egunetik egunera gehiago ematen didate eta hobeak garela sentitzen dut". Gainera, Aznarrek esan du argi dagoela taldeak konfiantza lortzeko puntuak behar dituela, baina "egiten ari garen horretan eta egiten ari garen bidean sinesten dugu; denboraldi polita eman diezaguke horrek. Urriaren amaieran hurrengo geldialdia iritsi baino lehen ziklo honetan hiru puntu lortzeko ilusioa dugu".