Iribar-Muniain, oroimenerako irudia

Iker Muniain San Mamesera itzuliko da bihar partida gehien jokatu dituzten sailkapenaren bigarren postuan. Txetxu Rojo gainditu zuen Reale Arenan eta dagoeneko 542 neurketa daramatza, Jose Angel Iribarren 614 neurketetatik urrun. Efemeride hori ospatzeko espero zen derbia ez zen maila orokorrean atera, nahiz eta nafarraren ibilbide bikaina hor geratu. Kapitaina eta Txopoa elkarrekin erretratatu dira gaur Lezaman, entrenamenduaren aurretik. Bien artean, zuri-gorrien historiako 1.156 norgehiagokatan egon dira zelaian. Orain arte jokatutakoen laurdena baino gehiago.

Plantillako beste bi jokalari daude sailkapen honetako goiko aldean. Oscar de Marcos Markel Susaeta (507) lagun eta taldekide ohiarengandik bi partidatara dago. Geldialdiaren ondoren, FC Barcelonaren aurka, seigarren postuan berdindu dezake. Eta beste bostekin, Andoni Iraola harrapatuko luke.

Atzetik, 390 dituen Iñaki Williams dator. Zortzi neurketa gehiagorekin, partida gehien jokatu dituzten hogei jokalari zuri-gorrien artean sartuko litzateke. Eta Almeriaren aurka gola lortuz gero, hain zuzen ere, postu horretan sartuko litzateke klubeko golegileen artean, Ziganda eta Venancio berdinduta (91). Hiru ibilbide bikain osatzen ari dira Athleticen, baina ziur talde andaluziarraren aurkako hiru puntuak eskuratzeko, banakako estatitikak sakrifikatuko zituztela.