Anfieldeko bataila gogoan, Juanjo Elgezabalekin

Lech Poznan talde poloniarra gainditu ondoren, 1983-1984 denboraldiko Europako Kopako final zortzirenetako zozketak Liverpool FC eta Athletic Cluben arteko kanporaketa ezarri zuen. Lau hamarkada beranduago, orduko lehia horiek gogora ekarri dugu Anfieldeko norgehiagokan hasierako hamaikakoan aritu zen Juanjo Elgezabalekin batera.

1963ko abenduaren 22an jaioa, bakioztarra Javier Clementek zuzendutako lantaldearen jokalari gazteenetako bat zen. Bere lehen partida, 1983ko urtarrilean jokatu zuen UD Las Palmas taldearen kontra, eta, asteak igaro ahala, Barakaldoko prestatzailearen konfiantza bereganatu zuen. Horren eredu, urte hartako udazkenean, besteak beste, FC Barcelona-ren aurka Camp Noun edo aipatutako Lech Poznan zein Liverpool FC-ren aurkako kanporaketetan parte hartu izana. Erdilari ohiak Anfield Road-eko futbol zelaian etxekoen oldarraldiak, lehoiek egindako defentsa lana eta izandako aukerak oroitu ditu. Berdinketak euskaldunen itxaropenak piztu zituen, baina bueltako partidan ingelesak nagusi izan zirela azpimarratzen du Elgezabalek. Ian Rush galestarraren tantoak Athletic Cluben aukerekin amaitu zuen. Gorriek Graeme Souness, Kenny Dalglish, Ian Rush bera edo Sammy Leeren gisako izarrak zituzten eta denboraldi horren amaieran Europako txapeldun izatea lortu zuten.

Urte horietan derrigorrezkoa zen soldaduzka egin behar zitarea eta horrek Elgezabalen bidea trabatu zuen. Horrenbestez, kurtsoa lehen taldea eta Bilbao Athletic uztartuz bukatu zuen. Hala ere, 1984an koru hirukoitza lortu zuen taldearen parte da, Club Atletico de Madrid eta Sevulla FC taldeen aurka golak sartuz gainera. Guztira, 68 partida jokatu zituen elastiko zuri-gorria jantzi zuen zazpi denboraldietan. Behin Klubetik kanpo, bere ibilbideak CD Logroñes, RCD Espanyol eta Gernika Club taldeetan jarraitu zuen.

Historian zehar, sei izan dira Athletic Club eta Liverpool FC-ren arteko norgehiagokak. Aurreneko biak, 1968-1969 denboraldiko UEFA txapelketako kanporakleta izan ziren. Bi partidetan etxeko taldeek bi eta bateko markagailua eskuratu ostean, berdinketa apurtzeko, epaileak txanpona airera bota zuen irabazlea zein zen ebazteko: Zorionez, Athletic Clubek aurrera egin zuen. Ondoren, 1983ko udazkeneko partidak iritsi ziren, garai hartan Europako onenen artean zeuden bi talde nor baino nor arituz. Azken urteetan, 2017 zein 2021ean, Athletic Clubek eta Liverpool FC-k lagunarteko lehiak jokatu dituzte Dublingo Aviva Stadium futbol zelaian zein Anfielden.