"Partidari azkena balitz bezala aurre egin behar diogu"

Koparen txanda heldu da. Beti Athletic Cluben eta bere zaleen ilusioa pizten duen lehiaketa. Zuri-gorriek lehen kanporaketatik jokatuko dute KO txapelketa, etxetik kanpo eta partida bakarrean, eskualde mailako aurkari baten aurka. Can Rosès zelaia, Rubi hiria eta bere kluba, Unio Esportiva Rubí taldea, lehoiek beren etxea bisitatzeko zain daude. Horrela hasiko da Kopako abentura berria.

Bada, Ernesto Valverde hedabideen aurrean agertu da partidaren atarian, eta honako hau adierazi du biharko Kopako estreinaldiari buruz: "Lehiaketa berri bat hasiko dugu. Kopa klasiko bat da. Lehen kanporaketan mundu guztiak irabaziko duzula uste duen partida jokatuko dugu, baina, era berean, ezohiko zelai batean eta motibazio gehigarria duen talde baten aurrean jokatzeko desabantaila dugu. Asko dute irabazteko eta gutxi galtzeko. Oso prestatuta joan behar dugu. Munduko ilusio guztiarekin jokatuko dute eta euren zaleen babesa sekulakoa izango da. Neurketa arretaz eta tentuz hasten ez badugu, orduan has gaitezke zalantzak izaten".

Horren aurrean, teknikari zuri-gorriaren mezua argia da: "90 minutuko neurketa jokatuko dugu eta edozein unetan edozer gauza gerta daitekeela pentsatu behar dugu. Lehiaketaren kanporaketa honetan egotea irabazi duen taldea da eta errespetu osoa merezi dute. Haiei errespetua adierazteko modurik onena hara joatea eta zer garen eta nola jokatzen dugun erakustea da".

Kanporaketako gakoaz galdetuta, honako hau erantzun du Valverdek: "Partida hauek beti lehiaketa-ikuspegiarekin aurre egin diegun taldea gara, eta horrela joan gara kanporaketak igarotzen. Horrek esan nahi du azken partida balitz bezala egiten diegula aurre partidei. Egia da zenbait mailako aldea dagoela, baina aurkaria beti hartu behar da kontuan. Kanporaketak gainditu eta zozketetan gure izena ikusten jarraitu nahi badugu, ezin gara txorakeriekin ibili".