"Nire kasua behetik datozenentzako mezu bat da"

Adu Ares kontent agertu da hedabideen aurrean Athletic Clubekin beste hiru denboraldiz berritu ostean, 2027ra arte: "Oso pozik nago Klubak nigan konfiantza duelako kontratu berritze honekin, eta egiten dakidanarekin zelaian itzultzea besterik ez zait geratzen".

Lehen taldearekin bere bigarren denboraldia osatzen ari da, nahiz eta oraindik bigarren taldeko dortsala duen, eta 29 zuri-gorriak 13 partida jokatu ditu guztira orain arte liga eta koparen artean: "Normala da eta ulertzen dut. Lehia handia dago postu honetan, eta geratzen zaidan gauza bakarra entrenatzaileak behar nauenerako prest egotea da. Maila handiko jokalariak ditut ondoan, eta eskertzen dut, gehiago exijitzen nautelako eta egunerokoan asko ikasten dudalako. Beraz, asko hobetzen ari naiz".

Hegalekoa Santutxu FC taldetik heldu zen 2021/22 denboraldian eta ordutik hona bere progresioa oso azkarra izan da: "Nolabait esateko ezerezetik etorri nintzen eta lehen taldera iritsi ahal izan naiz oso denbora gutxian. Behetik datozenentzako mezua da. Duela hiru urte esan izan balidate, ez nukeen imajinatuko. Neurri batean Patxi Salinasi esker iritsi naiz honaino, Basconiatik ezagutzen baininduen eta konfiantza hori eman zidan Bilbao Athleticen jokatzeko".

Azkenik, Adu Ares baikor agertu da taldeak gaur egun duen martxaren inguruan. Larunbat honetan, 16:15etik aurrera, Atletico Madrid hartuko dute lehoiek San Mamesen: "Gaur arte erakutsi du aurkari oso gogorra dela, baina aldagela oso ondo ikusten dut, gu oso indartsu sentitzen gara etxean. Egun garrantzitsuan, 125. urteurrenaren itxiera ospatzen den eta klub honentzako mitoa den Iribarre estatua altxatzearekin hasiko den egunean,  zaleei poztasuna ematea espero dugu".