Etenik gabe, ligak aurrera darrai Levante UD taldearen aurka

Liga F bueltan da, eta atsedenik gabe, lehoiek jardunaldi berri bati ekingo diote txapelketa erregularrean. 19.a izango da eta Athletic Clubek Valentziara bidaiatuko du igandean Levante UD taldea bisitatzeko. Partida Buñoleko instalazioetan jokatuko da eta 12:00etan hasiko da (Gol Play eta Dazn). Zuri-gorriek porrota jaso zuten ostegunean San Mamesen FC Barcelonaren aurka Kopako finalerdietako joaneko partidan, eta ia ez dute denborarik izan partida oso zorrotz hau prestatzeko.

Aitzakiarik gabe eta sailkapenean gora egiten jarraizteko asmoz, bilbotarrek beste erronka bat dute bihar valentziarren kontra jokatzerakoan. Sanchez Verak zuzentzen duen taldea hirugarren doa 39 punturekin eta Txapeldunen Ligako postuan dago. Bitxia bada ere, partida bakarra galdu du ligan, eta Lezaman izan zen, lehen itzulian. Neurketa 1-0ekoarekin amaitu zen Ane Azkonak sartutako golari esker.

Gainera, Levante UD-k Real Madrid gainditu du bere zelaian eta Johan Cruyffen FC Barcelonarekin berdindu zuen. Hain zuzen ere,  biharko arerioa, berdinketa horren eta Ipuruan SD Eibarren aurka lortutakoaren ostean helduko da lehia honetara. Athletic, bere aldetik, geldialdiaren ondoren bi garaipen jarraian kateatu ditu, eta denboraldia ahalik eta hobekien amaitzen saiatuko da.

Egia da joan den urtarrilean Valentziako taldeak Mayra Ramirezen baja garrantzitsua izan zuela. Kolonbiako selekzioarekin aritzen den aurrelaria Chelseara joan zen, eta orduan Ingalaterrako ligako fitxaketarik garestiena bihurtu zen. Hala ere, horrek ez du eragin handirik izan eta, ondo definitutako joko-eredu batekin, ligako podiumerako borroka gogorrean jarraitzeko hautagaietako bat da. Athleticek Kopako finalerdia alde batera utzi beharko du (itzulikoa datorren ostegunean jokatuko du) eta Levanteri berriro irabazteko behar den indar guztia atera beharko du.