Jokalarien egoera fisikoari buruzko balantze orokorra

Josean Lekue, Athletic Clubeko zerbitzu medikoen burua, komunikabideen aurrean agertu da denboraldiaurrearen hasieran jokalarien egoera fisikoaren balantze orokorra egiteko: "Klubaren babesle ofiziala den IMQ-rekin, egindako proba medikoak normaltasunez eta aldeko emaitzekin joan dira".

Parte hartuko duten lau lehiaketen artean konpromiso asko dituen denboraldiari aurre egingo diote lehoiek, eta, jakina, plangintza horretara bideratuta dago: "Partida askoko denboraldien kudeaketan esperientzia handia duen talde tekniko bat dugula baloratu behar dugu, eta hori abal bat da. Ikuspegi medikotik, guri dagokigunez, arreta zehatzagoa jartzen dugu lan-kargaren kontrolarekin lotutako guztian, errekuperazio-tresnekin (modu eraginkorrean erabiltzeko gai izan behar dugu) eta taldeari egiten diogun ohiko jarraipen-prozesuekin, jakinda neurketen kopurua nabarmen handituko dela".

Lekuek adierazi duenez, futbolari bakoitzak bere plana dauka: "Gaur egun, kirol profesionalean, jokalari guztiek, lan bloke komunaz gain, banakako lan planak dituzte. Beren adinagatik ibilbide luzeagoa duten jokalariei dagokienez, ziur aski beren lan-karga gehiago mugatuko da egunerokoan. Geroz eta informazio gehiago sortzeko gai gara, eta informazio hori prozesatzeko eta ekintza erabilgarrietan bihurtzeko gai izan behar dugu. Hor dago bilakaera handiena azken urteetan".

Eurokopako titulua eskuratu ondoren, Unai Simonek, Dani Vivianek eta Nico Williamsek oporrak izango dituzte orain: "Hasierako aurreikuspenen arabera, lau asteko atsedenaldia izango dute. Haiekin, jokalari guztiekin bezala, atsedenaldirako lan-plan bat aurreikusi da, gainerako taldekideen gainetik izan dituzten entrenamendu- eta lehiaketa-minutuen ezaugarrietara egokitua".

Atezainaren kasuan, atzeratu egingo da bere itzulera kirol-jarduerara, aste honetan ebakuntza-gelatik igaroko baita eskuineko eskuan duen arazoa tratatzeko: "Ezegonkortasun eskafosilunarra dauka eskumuturrean. Hilabete batzuetako eboluzioa izan duen lesioa da, eta denboraldian zehar eboluzionatzen joan da. Datorren ostegunean kirurgia egingo diote. Ez gara sartzen baja-denboren iragarpenetan, baina hilabeteetakoa izango da".

Gaur egun lesionatuta dagoen beste jokalaria Nico Serrano da, iragan denboraldiaren amaieran muskulatura iskiosuralean lesio larria izan zuena: "Testuinguru horretan, ezker sorbaldan duen lokadura errepikakorraren kirurgia egitea baloratu dugu. Une honetan bi fronteak ditu, eta bien bilakaera oso ona izaten ari da, inolako arazorik gabe".