Bi bitxi klasiko Thinking Football-en

Asteburuko etenaldiaren ostean, Thinking Football taldea indartsu itzuli da astelehen honetan, futbol-zinemaren benetako bi bitxi aurkeztuz: "Volver a vivir" Mario Camusek zuzendutako filma eta "Looking for Eric" Ken Loach zuzendari ingelesaren filma. Tamalez, maisulan honen gidoigileak, Paul Lavertyk, ezin izan du azkenean Sala BBK-n egon, bere hegaldia bertan behera geratu baita eguraldiagatik. Haren ausentzian, Galder Reguera, jaialdiaren zuzendaria, eta Carlos Marañon, idazlea eta futbolari buruzko zineman ahots onenetakoa, izan dira solasaldiaren arduradunak.

"Looking for Eric" (2009) historian egindako futbolari buruzko film onenetako bat da. Ken Loach (Nuneaton, 1936) zuzendari ingelesak zuzenduta, Epaimahaiaren Saria irabazi zuen Cannesko Zinemaldian. Ken Loach eta Paul Laverty ohiko gidoilari kolaboratzailearen zigilua du filmak. Zigilu horrek, zinema sozialaren etiketarekin, gizatasunez beteriko istorioak birsortzen ditu. Eric Cantonak maisutasunez interpretatzen du bere burua krisi garaietan adiskidetasunak duen garrantziaz hitz egiten duen film honetan.

Horretaz guztiaz hitz egin dute Carlos Marañonek eta Galder Reguerak proiekzioaren ondorengo solasaldian. Marañonek futbolaren presentzia nabarmendu du Ken Loachen filmetan, adibidez, "Kes" (1969) edo "Mi nombre es Joe" (1998) filmetan. Presentzia hori ez da kasualitatea, eta kirol horrek gizartean duen garrantziaren ondorio da. Carlos Marañonek adierazi duenez, "futbola oso garrantzitsua da jendearen bizitzan, eta Ken Loachen zinemak jendeari buruz hitz egiten du; beraz, normala da baloiak bere zineman hain presentzia garrantzitsua izatea".

Aurretik, arratsaldeko bostetan, Mario Camus zuzendari ezagunaren lan handienetako bat ikusi da, "Los santos inocentes" eta "La colmena" bezalako pelikula aipagarrien egilea. 

Asteartea, azken eguna “Hamaika andra zurigorri” eta “Un gran equipo”-rekin

Thinking Football 2024ren amaiera gisa, Athletic Clubentzat zapore bereziko zine saio bikoitza izango da.

17:00etan "Hamaika andra zurigorri" dokumentala proiektatuko da. Bertan, hainbat arlotan bidea ireki duten hogeita hamar aitzindari inguruk parte hartuko dute euren testigantzekin. Oraindik sarrerak daude eta erreserba egin daiteke HEMEN

Eta 19:00etan, "Un gran equipo". Asperger duen haur problematiko bati buruzko kasu erreal batean oinarritutako film ederra da, eta hunkitu egiten du asperger duten pertsonen unibertsoa ulertzen laguntzen duen aldi berean. Aita-semeek, filmeko protagonistek, proiekzioaren osteko solasaldian parte hartuko dute. Ez dago sarrerarik.