FC Viktoria Plzen: Europa Leagueko Liga Faseko azken oztopoa

Europa Leagueko Liga Faseko zortzigarren eta azken jardunaldian, 21:00etatik aurrera ordutegi bateratuarekin jokatuko dena, Athleticek bere esku dauka txapelketako 16 talde onenak egongo diren kanporaketara sartzea. Lehoiek Txekiar Errepublikako Viktoria Plzen taldea hartuko dute San Mamesen eta emaitza positiboa lortuz kanporaketa gehigarri bati aurre egitea saihestuko lukete.

 

Aurkaria

Viktoria Plzenek porrot bakarra jaso du Europa Leaguen, Manchester Uniteden aurka (1-2), eta hiru garaipen lortu ditu (Reala 2-1, Dínamo de Kiev 1-2 eta Anderlecht 0-2), bai eta hiru berdinketa ere (PAOK 2-2, Ludogorets 0-0 eta Eintracht 3-3). Matematikoki playoffetarako sailkatuta, txekiarrek ere final-zortzirenetarako sailkapen zuzena lortu nahi dute 12 punturekin. Txekiarren Ligan bigarrenak dira, Slavia Praharen atzetik. 

1911n Jaroskav Ausobsky trenbideetako funtzionarioak hainbat sekziotako klub gisa sortua, FC Viktoria Plzenek Bleskeko zirkulu bezala ezagutzen den gunean futbolean jokatzera elkartzen ziren gazteak antolatzen zituen bere hastapenetan. Txekiar Errepublikako Plzen hiriko taldeak Ligako sei titulu ditu (guztiak 2011 eta 2022 bitartean), Kopako bi eta Superkopako beste horrenbeste bere palmaresean. 325.000 biztanle ditu bere metropoli-eremuan, eta Bohemiako mendebaldean dago, Praga hiriburutik 100 kilometro baino gutxiagora. Gainera, ohikoa izan da azken hamarkadako Europako txapelketetan, eta Txapeldunen Ligan ere lehiatu du. Viktorka ezizenez ezaguna den taldeak zuri-gorrien aurka neurtu zituen indarrak 1923an San Mamesen jokatutako lagunarteko partida batean. Golegileak Jose Antonio Agirre lehendakaria, birritan, eta Jose Legarreta izan ziren.

Bere partidak Doosan Arena zelaian jokatzen ditu, 1955ean Txekoslovakiako Alderdi Komunistak antolatzen zuen eta herrialde osoko 750.000 atletek parte hartu zuten Spartakiada kirol-ekitaldia hartzeko. 11.700 ikuslerentzako lekua du orain, hasiera batean 35.000 pertsona har zitzakeen arren, eta Strunc Parcean dago, Mze eta Radbuza ibaien elkarguneetatik gertu.

 

Datu interesgarriak

• Entrenatzailea: Miroslav Koubek. 71 urte ditu eta FC Viktoria Plzen zuzendu du hiru etapatan. 2001 eta 2002, 2014 eta 2015 urteen artean (urte horretan Liga eta Kopa irabaztea lortu zuen) eta 2023tik aurrera. Era berean, Txekiar Errepublikako beste klub handi batzuen buru izan da, adibidez, Slavia Praha edo Bohemians, 19 urtez azpiko Txekiar Errepublikako hautatzaile izan zen 2013an eta 2014an, eta Txinako ligan ere esperientzia dauka.
• Jokalari aipagarriak: Viktoria Plzenek txekiar selekzioko hainbat futbolari ditu: Lukas Cerv, Martin Jedlicka eta Pavel Sulc. Beste beterano batzuk nabarmentzen dira, hala nola, Lukas Hejda, Jan Kpic, Matej Vydra, Vaclav Jemelka, Lukas Kalvach edo Milan Havel eta gazte promesak Jan Paluska, Jiri Panos, Tom Sloncik, Christophe Kabongo eta Prince Kwabena Adu. Azkenik, jokalari atzerritarrei dagokienez, Svetozar Markovic (Serbia), Cody Sene (Senegal), Ricardinho eta Cadu (Brasil), Rafiu Durosimni (Nigeria), Jhon Mosquera (Kolonbia), Cheick Souaré (Frantzia), Eric Jirka (Eslovakia) eta Sampson Dweh (Liberia) daude taldean.

Athletic Club - FC Viktoria Plzen: ordutegiak eta non ikusi

Athletic Club eta FC Viktoria Plzen taldeen arteko Europa Leagueko Liga Faseko zortzigarren partida jokatuko da ostegun honetan, otsailaren 2an, 21:00etan, San Mamesen. Movistar + Liga de Campeones-en bidez jarraitu ahal izango da.