“Derbia irabazten duena emozionalki suspertuko da”

San Mamesek Athleticen eta Realaren arteko derbia hartu baino egun bat lehenago, David Aznarrek bere iritziak eman dizkie komunikabideei Lezaman. Talde zuri-gorria 0-4 Betis jipoitzetik dator, eta entrenatzailearen arabera, "energia onarekin gatoz, etxetik kanpo garaipena lortu eta azken irteeretan irabazi dugu. Gure unerik onenean helduko gara, eta gogo handiz gaude".

Zuri-gorriek eta txuri-urdinek 32 punturekin neurtuko dituzte indarrak 19. jardunaldian. "Derbia da, ez da erabakigarria izango, puntu asko falta direlako jokatzeko, baina irabazten duena emozionalki suspertuko da", esan du entrenatzaileak, eta taldeak bere nortasuna errespetatu eta bere bertsiorik onena eman behar duela uste du, zaleei garaipena eman ahal izateko. "Mundu guztia animatzen dut etortzera, ziur bainago ikuskizunak ez duela huts egingo", bota du.

Euskal futbolaren osasun ona

Bi taldeak laugarren eta bosgarren postuan daudela, Aznarrek uste du "partida hau euskal futbolaren osasun onaren isla dela, emakumezkoen sekzioaren aldeko apustua egiten duten eta Txapeldunen Ligara sailkatzeko borrokan ari diren bi kluben artekoa. Biek historian zehar egindako lanaren emaitza da. 19. jardunaldian postu horietan zaudenean ez da kasualitatea".

Kirol arloari dagokionez, Realak ostegun honetan "Real Madridekin etxetik kanpo norgehiagoka zorrotza" jokatu izanak eragina duela uste du, baina "partida hauetan energia soberan" dagoela uste du. Gainera, Athleticeko entrenatzaileak ohartarazi du Reala izaera handiko taldea dela. "Sanchez Vera ezagututa, bere taldeak ez du amore emango, 90 minutuak lehiatuko dituzte. Ez dugu testuinguru errazik espero, beraz, guk gure bertsiorik onenean egon beharko dugu. Haiek talentu handia dute, bloke oso finkatua dute eta fitxaketek asko lagundu diete. Oso erasokorrak dira arerioaren zelaian. Erritmo altua eramaten saiatuko gara, eta, nire ustez, erritmo horretan egin diezaiekegu min".

Txapeldunen Ligatik puntu bakarrera, David Aznarrek uste du hirugarren postu hori lortzeko presioa Atletico de Madridentzat dela eta "talde asko gaudela ahalik eta zailen jartzeko asmoarekin. Denok saiatuko gara ez hutsik egiten, baina beti esaten dut helburu hori betebeharra baino gehiago ilusioa dela guretzat".