Txapeldunen Ligako lehia San Mamesen

Hirugarrenak bigarrenen aurka. Real Madridek San Mamesi egingo dion lehen bisita. Txapeldunen Ligako postuak jokoan. Athleticen hirugarren partida bere katedralean. Futbol egun handia. Arrazoi asko gehitu daitezke igande honetan Athletic Clubek eta Real Madridek jokatuko duten Liga F-ko 20. jardunaldia ez galtzeko. Lehoiek beste hiru punturekin itxi nahi dute Katedralean jokatutako partiden zikloa, aurreko jardunaldian Realaren aurkako derbian 21.000 pertsona baino gehiagoren aurka lortutako garaipenaren ostean. Eskuratu hemen zure sarrera

Geldialdia tarteko, bi taldeek hutsune ugari izan dituzte astean zehar nazioarteko deialdiengatik eta lesio moduko beste ezusteko batzuengatik. Zuri-gorrien aldetik, Clara Pinedok min hartu du eta Teresa Abelleirak, talde merengeko erdilariak, belauneko lesio larri baten ondorioz denboraldia galduko du.

Hori alde batera utzita, bi taldeek sasoi bikainean dadue. Madrildarrak sendo mantentzen dira bigarren postuan eta bost puntura duten FC Barcelona liderrari presioa sartzen ari dira. Athletic, bestalde, hirugarren kokatuta dago eta, ondorioz, Europako postuetan euskal derbian garaipena lortu eta Atletico Madrilek aurreko jardunaldian porrot jaso ostean. Athleticek azken hamaika partidetatik zortzi irabazi ditu. Liga F txapelketa une gorenean dago eta lehiakide asko daude hirugarren postua lortzeko. Beraz, edozein galerak aldaketak eragin ditzake sailkapenean.

Etxetik kanpo dena irabazi duen aurkaria

Athleticek Real Madridi irabazten badio, 10 norgehiagoketatik bakarrean lortu duena, hirugarren postu ilusionagarrian lo egingo du beste behin. Hori bai, Valdebebasetik kanpo jokatu dituen partida guztiak irabazita, bisitari gisa sendotasun handia erakutsi duen arerioa gainditu beharko du. Alberto Torilen taldeak nazioarteko izarrak eta munduko txapeldun batzuk ditu. Caicedo, Feller, Bruun, Alba Redondo, Weir... bolbora merengea oso maila altukoa da. Baina hori gutxi esatea da, lerro guztietan talentua eta fisikoa baititu.

Gainera, zuriek euren historia laburrean (2020 sortu zen kluba) lehen aldiz zapalduko dute San Mames estadioa, lehen itzulian lortutako garaipena errepikatzeko asmoarekin. Iraileko partida hura 2-0ekoarekin amaitu zen eta lehen zatian zehar epaileek erabaki polemikoak hartu zituzten. Nahikari Garciak eta David Aznarrek bere talde ohiarekin egingo dute topo berriro.

Zalantzarik gabe, Europarako lehia izango da, eta San Mameseko harmailak emakumezkoen futbolik onenaz gozatuko dute berriro. Hirugarren norgehiagoka estadioan, FC Barcelonaren aurka galdu eta Realaren kontra 2-0 irabazi ondoren. Giroa hazten joan da eta zuri-gorriek euren onena eman nahi dute harmailetatik jasotzen duten maitasun guztia itzultzeko. Igande honetan Athleticek Real Madrid hartuko du partida historiko batean. Lehoiek zuriak geldiaraziko al dituzte Katedralaren laguntzarekin?