“Jokatu dezakegun partidarik politenetakoa da”

Bihar, 12:00etatik aurrera, baloia martxan jarriko da Katedralean, Athletic Clubek eta Real Madridek zelai honetan lehen aldiz jokatzeko. David Aznarrek, talde zuriaren historiako lehen entrenatzaileak, bere talde ohiari aurre egin beharko dio hitzordu berezi batean eta pizgarri askorekin. Horren guztiaren inguruan mintzatu da gaur goizean prentsaurrekoan.

Entrenatzaile zuri-gorriak Clara Pinedoren baja deitoratu du, "azken partidetan sasoi onean zegoelako". Gainera, biharkoa "izan dezakegun partidarik politenetakoa" dela esan du. Bere ustez, zalantzarik gabe, aukera paregabea da: "Testuinguruagatik, San Mamesen jokatzeagatik eta ligako bigarren tokian dagoen Real Madriden aurka jokatzeagatik. Guretzat talde mota honen aurka indarrak neurtzeak haztea ahalbidetzen digu. Egoera honetan erosoago sentitzen gara, nahiz eta ez dugun prestaketarako denbora askorik izan astean zehar hainbat jokalari selekzioekin egon direlako. Hala ere, ziur nago partida ona egingo dugula", zioen Athleticeko entrenatzaileak.

 

“Eroso sentitzen gara San Mamesen”

 

Athleticek aurtengo bere hirugarren partida jokatuko du Katedralean, urtarrilean FC Barcelona liderraren kontra luzapenean porrota jaso ondoren, eta duela bi asteko euskal derbia, lehoiek 2-0 irabazi ondoren 21.000 pertsona baino gehiagoren babesarekin. "Oso testuinguru motibagarria da guretzat. Jokalari asko hazi dira San Mamesera joanda. Halako talde gaztea bertan nola moldatuko zen beldur ginen. Arerio zailak aukeratu ditugu eta maila eman dugu. Meritu handia eman behar zaio", adierazi zuen Aznarrek.

Ildo beretik, zaletuak bihar San Mamesera joatera animatu ditu. "Realaren aurka jendeak ondo pasatu zuen. Zaleek lagundu egin behar digute, Txapeldunen Ligako zaleak behar ditugu helburu horrengatik borrokan ari garelako. Asko laguntzen digute, gure motorra dira eta beraientzat jokatzen dugu, ondo pasa dezaten eta beste garaipen bat eskaini nahi diegu".

 
Azkarrak dira baloiak lapurtzean

 

Aurkariak lehen aldiz bisitatuko du San Mames eta ohiko eskaintza egingo dio Pitxitxiren bustoari. David Aznarrek ohartarazi duenez, "Real Madridek esperientzia handiko jokalariak ditu. Proiektu hori sendotzen ari da, eta dagoeneko aldea zabaldu du ligako gainerakoekin. Orain, tituluren bat lortzeko lehian ari dira Barçarekin".

90 minutu sailkapenean bigarren eta hirugarren doazen bi taldeen artean (Txapeldunen Ligako postuetan) eta Athleticeko entrenatzailearen ustez dena xehetasunen arabera zehaztuko da. "Abiadura handia dute goian, eta solidarioak eta konprometituak izan beharko dugu. Bertikalak dira. Baloia ematen dizute partidaren kontrola duzula sinestaraziz, eta kentzen dizutenean ziztu bizian irtetzen dira gorantz. Kontuz ibili beharko dugu bere trantsizioekin", iragarri zuen Davidek.