Athletic Club-AS Roma partidaren inguruko segurtasun informazioa
Athletic Club-AS Roma partidaren inguruko segurtasun informazioa
Udaltzainak eta ertzainak egun osoan arduratuko dira zaletuen arteko bakea bermatzeaz
Bilbok dispositibo zabala jarriko du abian, Udaltzaingoak, Ertzaintzak eta Athletic Clubek koordinatuta, ostegunean San Mamesen jokatuko den UEFA Europa Leagueko final-zortzirenetako itzuliko partida dela eta. Neurketa 18:45ean hasiko da, eta Athletic eta AS Roma izango dira aurrez aurre.
Norgehiagoka hau, gainera, protokolo eta segurtasun neurri batzuen entsegurako baliagarria izango da, datorren maiatzaren 21ean Katedralean jokatuko den txapelketaren final handira begira.
Hori dela eta, finalaren egunean zelaiaren inguruan instalatuko den perimetroko hesiko zati bat jarri da, egiturak berak eta horren bidezko sarbide-kontrolek zelan funtzionatzen duten egiaztatzeko.
Gainera, egun osoan, Ertzaintza eta Udaltzaingoa urian zehar ibiliko dira, zaleen arteko bakea bermatzeko eta lanegun bateko ohiko jarduerak partidaren aurreko giroarekin normal egin ahal izateko.
Zirkulazioko etenak eta herritarren segurtasuna
Diseinatutako segurtasun-dispositiboak batez ere San Mames inguruan izango du eragina, bi taldeetako zaleen segurtasuna bermatzeko neurriak zehazteko, bai eta herritar guztiena ere. Horrela, bada, zirkulazioko lehen etenak 15:00etan izango dira, Felipe Serraten eta Luis Briñas kaleetan. Handik gutxira, 15:45ean, Kale Nagusian, Sabino Arana etorbidean, Euskalduna zubian eta Jesusen Bihotzean beste hainbat gune itxiko dituzte.
Tranbiaren zerbitzuan ere eragina izango da eta 16:00ak eta 17:00ak bitartean Euskalduna Jauregiko geralekuraino bakarrik iristea aurreikusten da.
Bertoko zaleei zelaira hurbiltzeko garraio publikoa erabiltzea eta behar besteko aurrerapenarekin sartzea gomendatzen zaie.
Era berean, Europako horrelako ekitaldietan ohikoa den prozedurari jarraituz, topagune batean deituko zaie bisitariei, Ertzaintzako agenteek lagunduta San Mamesera elkarrekin joan daitezen. AS Roma zaleentzako meeting pointa Iparragirre kalean egongo da eta 15:45ak aldera zelaira abiatuko direla uste da. Fan march hori dela eta, Luis Briñasen tabernei (Poza Lizentziatuaren eta Felipe Serrateren artean daude) gomendatzen zaie 15:00etatik 17:30era bitarteko terrazetako elementu mugikorrak kentzea. Gomendio hori, terrazak kentzearena, AS Romaren zaleen topagunearen ingurura zabaltzen da.