Yeray: "Futbola alde badugu, kanporaketari buelta eman diezaiokegu"

Bere ibilbideko partidarik garrantzitsuenetako baten atarian, Yeray Alvarezek fede, adore eta konpromiso mezu bat partekatu du Old Trafforden Manchester Uniteden aurkako Europa Leagueko finalerdietako itzulerako partidaren atarian.

Athletic Clubeko futbolariak, 30 urte dituela Europako bere lehen finalerdia jokatuko duenak, taldeak San Mamesen jasotako 0-3ko aurkako emaitzari buelta emateko aukerak dituela uste du: "Joaneko partida amaitu zenetik, gure zaleen babesarekin, markagailua iraultzen hasi zen", adierazi du erdiko atzelariak, jipoiaren ostean taldearen erantzun emozionala berehalakoa izan dela sinetsita. "Taldea konfiantzaz dago, denetik gerta daitekeela jakinda lan egin du, eta edozein unetan futbola alda daiteke", esan du. "Edozein jokalariren ametsa da horrelako neurketak jokatzea. Badakit zein zaila den horrelako finalerdi batera iristea, eta are gehiago hainbeste urte Europan sartu gabe eman ondoren".

Yerayk Athleticek Katedralean lehen 30 minutuetn emandako mailari erreparatzen dio, tarte horretan Manchester United menderatu baitzuten eta aukera argiak sortu zituzten: "San Mamesen jokalari bat gutxiagorekin gelditu aurretik ikusi ziren minutu horiek Athleticek erakutsi nahi duen futbola dira. Goian estutu behar ditugu, ahalik eta abagune gehien sortu eta haiek gol bihurtzen saiatu. Futbola alde badugu, kanporaketari buelta eman diezaiokegu. Dena delakoagatik lortzen ez badugu, taldeak %100a utziko du".

Hala ere, atzelariak ez ditu zailtasunak alde batera uzten: "Oso trebeak dira, eta abantaila txiki batekin, ezerezetik hiru gol egiten dizkizute". Athleticen bajen aurrean, Yerayk mezu argia bidali die fedea galdu dutenei: "Kolpea jaso baduzu, Athleticeko jokalariengan konfiantza gutxi duzulako da. 25 gara, jokalari garrantzitsuak dira, baina zuk imajinatu ordezkoek finalerdi hau jokatzeko duten gogoa. Kopako finalean harmailetan nengoen lehiatzeko irrikaz, dena emango nukeen. Talde bat gara eta denok daukagu gogo ikaragarria bihar hasieratik jokatzeko eta dena emateko".

Valverde: “Denboraldiko partida garrantzitsuena da”

Ernesto Valverde Athleticeko entrenatzailea ere irmo agertu da atarikoan, eta Old Trafforden jokatzeko moduan egongo direnengan arreta jartzearen garrantzia azpimarratu du. "Etortzen direnengan pentsatzen dugu, hemen egongo direnengan fokalizatuz. Unitedek ere bajak izango ditu, garrantzitsuena zelaian daudenak dira. Talde bat gara eta ditugun bajak arindu behar ditugu", adierazi du argi eta garbi.

Teknikariak badaki erronka zaila dela, baina ez du itxaropena galtzen: "Zaila da, emaitza nahiko kaskarra da eta aurkari handia da, baina futbola da, edozer gauza gerta daiteke eta beti onena espero dugu". Valverdek argi utzi nahi izan du deialdian ez daudenak jokatzeko moduan baleude hala izango zela: "Denboraldiko partidarik garrantzitsuena da oraintxe bertan".

Joanekoaren inguruan, norgehiagoka Vivianen kanporaketarekin aldatu zela onartu du: "11rekin gertuago geunden irabaztetik, baina haiek ez dute barkatzen eta guk akatsak egin genituen. Ahalmen handia dute, akats gutxiago egitea espero dugu". San Mamesen porrota kolpe latza jaso arren, Valverde harro agertu da egindako bideaz: "Oso pozik gaude lehiaketa honi nola aurre egiten ari garen ikusita. Badakigu horrelako kanporaketetan denak jokaldi edo minutu desegoki batean alde egin dezakeela. Prest egongo gara edozein aukera aprobetxatzeko".