“Hortzak estutu behar genituen, eta hala egin dugu”

Ernesto Valverdek komunikabideen aurrean agerraldia eskaini du Athleticek 1-0 Deportivo Alaves mendean hartu ostean: "Egia da gaur hasieratik nabaritu dela bi taldeak asko jokatzen ari ginela, denboraldi amaieran gaude eta presioa nabaria da. Gu saiatu eta saiatzen den taldea gara, eta asko bultzatzearen ondorioz lortu dugu guretzat oso garrantzitsua den garaipena. Europa Leaguetik kanporatu gaituzte, baina guk LaLigan borrokatzen jarraitu behar dugu".

Denboraldiaren azken txanpari dagokionez, honako hau adierazi du: "gainerako norgehiagoka guztiak irabaztera joan behar dugu, ezin dugu hori gainetik kendu. Orain, bi irteera ditugu aurretik aste honetan; horregatik, balio ikaragarria ematen diot irabazteari, bajen gaiaz gain, aurreko egunean neurketa osoan parte hartu zuten jokalari asko jokatu dutelako; hala nola Yuri, Yeray, Maroan, Jauregizar... Ostegunean min eman zigun partida galtzeak, hortzak estutu behar genituen, eta hala egin dugu".

Lesioei buruz galdetuta, Valverdek hauxe erantzun du: "Argi dago ez direla unerik onenean iristen. Final bat jokatzera zoazenean denak prest eduki nahi ditugu, baina partida asko daramatzagu eta horrek ere faktura pasatzen du. Une erabakigarrian gaude eta ea jokalari gehiago berreskuratu ditzakegun. Gaur Oihan berreskuratu dugu eta horrek berme gehiago emango dizkigu".