Athletic Club Football Centerrek 2026ko hasiera indartsua iragarri du

Athletic Club Football Centerrek, Athletic Clubeko prestakuntza zentroak, hasiera indartsua iragarri du 2026rako, goi errendimenduko futbolaren funtsezko arloetan hazi nahi duten profesionalentzako eskaintza akademiko berritu, espezializatu eta diseinatu batekin. Gauzak horrela, erakundeak berretsi egiten du baliozko ezagutza sortzeko eta teknikarien, analisten eta prestatzaileen garapena bultzatzeko konpromisoa, Lezamako berezko zigilu metodologikoaren eskutik.
 

Programa aurreratuak: bikaintasuna otsailetik

Prestakuntza denboraldi berriaren ardatzak bi Programa Aurreratu izango dira, biak otsailean hasteko, Athletic Club Football Centerren apustu nagusia direnak.

Scouting eta Talentua Detektatzeko Programa Aurreratuak bigarren edizioa egingo du, eta Futbol Zuzendaritzako, Idazkaritza Teknikoko eta Lezamako Zuzendaritzako kideek osatutako maila goreneko irakasle talde bat izango du berriro gidari. Programa hori scouterrei, idazkari teknikoei eta kirol zuzendariei zuzenduta dago, eta iaz erreferentziazko prestakuntza gisa finkatu zen, gure futbol zuzendari Mikel Gonzalezek ikasleen prestakuntza prozesuan parte hartu zuela azpimarratuz. Edizio berria nobedadeekin eta eduki gehiagorekin iritsiko da.

Bere ondoan, Futbolariaren Banakako Garapeneko Programa Aurreratua Lezamako mami pedagogiko eta hezitzailearekin lerrokatutako proposamen gisa aurkezten da. Entrenatzaileei, psikologoei, errendimendu analistei eta futbolariaren garapeneko profesionalei zuzenduta, kirol egitura zuri-gorriko teknikari eta arduradunek parte hartuko dute, jokalariaren hazkunde integraleko prozesuei sakontasunez heltzeko.

Bi programak online formatuan eskainiko dira, ikaspostu mugatuekin eta matrikula eskuragarri dagoela. Bigarrenean, gainera, aurrez aurreko jardunaldi esklusibo bat egingo da, prestakuntza ixteko.
 

Partidaren analisia zuzenean: esperientzia paregabea Champions League-n

Prestakuntza-eskaintza osatzeko, Partiden Analisirako Ikastaro Trinkoaren 5. edizioa egingo da, jokoaren azterlaneko analistei eta profesionalei zuzenduta. Prestakuntza oso praktikoa izango da, eta urtarrilaren 28an amaituko da, Athletic Cluben eta Sporting Portugalen arteko UEFA Champions Leagueko partida zuzenean aztertuz, eta aukera berezia izango da analisi profesionala barrutik bizitzeko. Azken plazak baino ez daude eskuragarri.
 

Espezializazio jardunaldiak: azken aukerak urtarrilean

Egutegia osatzeko, aurrez aurreko bi jardunaldi programatu dira, talde txikietan eta esperientzia osoarekin, Lezaman:

• Atezainen entrenatzaileen jardunaldia – 2026ko urtarrilaren 17an, atezaintzako entrenamenduaren eredu espezifikoetan sakondu nahi duten profesionalei zuzendua.
• Metodologia jardunaldia – 2026ko urtarrilaren 31n, aukera paregabea Lezamako prestakuntza prozesuak eta haien ikuspegi metodologiko integrala bertatik bertara ezagutzeko.

Bi jardunaldiak formatu trinkoan egingo dira, janaria barne, eta instalazioak bisitatzeko eta Klubeko talde teknikoarekin batera lan egun murgiltzaile bat bizitzeko azken aukeretako bat dira.
 

Prestakuntza espezializatuarekiko konpromisoa

Gauzak horrela, Athletic Club Football Centerrek goi mailako hazkunde espazioak eskaintzeko apustua sendotzen jarraitzen du, Athletic Cluben nortasunetik eta zorroztasunetik diseinatuta. Etorkizunari begiratzen dion prestakuntza proiektua, erakunde zuri-gorria bereizten duen espirituari eutsiz.