Athleticek Bergamon ereiten ditu bere balioak

Italiako Lehoiak Peñaren eta Bergamora joandako athleticzaleek, Gorka Iraizoz atezain zuri-gorri historikoa buru zutela, Walking Footballeko txapelketa txiki bat jokatu dute gaur goizean ASD Oratorio Monterossorekin -Walking Football talde lonbardiarra- Txapeldunen Ligako balorez beteriko atarikoan.

Futbol partidatxoaz gain, Gernikako Arbolaren kimu bat landatzeko ohiko ekitaldia egin da, Bergamon jasotako abegikortasunagatik eskerrak emateko.

 

Esanahi handiko ekitaldi sinbolikoak

Marcella Messina eta Oriana Ruzzini Bergamoko zinegotziak, Jon Ruigomez Athleticeko presidenteordearekin eta Klubeko gainerako ordezkari instituzionalekin -Igor San Roman, Laura Ruiz de Azua, Gorka Cubes eta Josetxu Urrutia batzordekideak, Johana Ruiz Olabuenaga Gizarte Arloko zuzendaria, Galder Reguera Fundazioko Arduraduna eta Gorka Iraizoz- izan da ekitaldi sinboliko honetan.

Marcella Messina eta Oriana Ruzzini udal zinegotziek ongi etorria emateko hitz atseginen ondoren, Jon Ruigomezek hitz egin du. Presidenteordeak antolatutako ekitaldien botere sinbolikoa nabarmendu du, haritzarekin batera doan plakaren legendan laburbiltzen den aurkezpen-gutuna baitira:

"Siamo arrivati come avversari, ce ne andiamo come amici. Grazie, Bergamo, eskerrik asko". "Aurkari gisa ezagutu genuen elkar, lagun gisa goaz. Eskerrik asko, Bergamo, eskerrik asko".

 

#FollowSomethingUnique Dortmund, Newcastle, Praga eta Bergamo hirietan

#FollowSomethingUnique izeneko ekimena Athletic Clubek Txapeldunen Ligako Fasean etxetik kanpo jokatu dituen lau hirietan egin da -Dortmund, Newcastle, Praga eta, gaur, Bergamo-, eta errespetuan eta kiroltasunean oinarritutako zaleen arteko lehia ulertzeko modua aldarrikatzen du, funtsezko balioak baitira Athletic Clubentzat.

Gorka Iraizoz, Italiako Lehoiak Peña eta ASD Oratorio Monterosso

Ondoren, jardunaldiak jarraitu du Bergamoko Monterosso auzoko San Gregorio Barbarigo Parrocchiaren ondoan dagoen zelaian. Bilbotik joandako ordezkaritza zuri-gorriak, Gorka Iraizoz buru zela, bi anfitrioi izan ditu:

Alde batetik, ASD Oratorio Monterosso, Walking Football taldea duen lonbardiar futbol taldea, 1977ko finalean Athleticen aurka jokatu zuen Juventuseko jokalari ohi Alberto Marchettik entrenatuta.
Haiekin batera, Italiako Lehoiak Peña, Franz Scordamaglia presidentea buru dela, eta bere alboan, Emiliano Gabrielli presidente ohia. Italia osoko peñazale zuri-gorriek zuri-gorriz markatuta zuten egun hau egutegian eta, Walking Footballeko partida antolatzen laguntzeaz gain, anfitrioi eta gidari bikainak izan dira espedizio zuri-gorria iritsi zenetik.

Atzo harrera ona egin zioten taldeari Bergamoko hotelera iritsi zirenean, opari bat eman zioten Lekue kapitainari eta afaria antolatu zuten athleticzaleen artean. 

Gaurko 11:00etan eman zaio hasiera partidatxoei eta, emaitza gutxienekoa denez lagunarteko partida horietan, sartutako golak alde batera utzita, azken emaitza berdinketa izan da.

ASD Oratorio Monterosso taldeko kide gehienak Atalanta BC taldeko jarraitzaileak direnez, Athletic Clubeko aurkaria gaur gauean, pikeak eta txantxak ere etengabeak izan dira, beti kirol giroan.