"Oso serio hartzen dugu Gironaren aurkako partida"

"Partida bakoitza desberdina da, gainditu beharreko azterketak dira eta puntuak batzen jarraitu nahi dugu. Biharko konpromisoa oso serio hartzen dugu, hirunaka batzeko. Aurrerapauso bat emateko aukera handia dugu, eta lortzen badugu, oso garrantzitsua izan daiteke". Horrela mintzatu da Ernesto Valverde Athletic Clubek bihar, larunbata, 14:00etatik aurrera Gironan jokatuko duen partida garrantzitsuaren inguruan. Lehoiek gainditu beharko duten proba zorrotza, sailkapenean gora begira jarraitu nahi badute: "Dena oso garrantzitsua da. Ez dago atzera bueltarik eta talde guztiek asko dugu jokoan. Orain ihes egiten duten puntuek ez dituzu berreskuratuko eta lortutakoak altxorra dira".

Athleticek Bartzelonaren aurka San Mamesen erakutsitako maila onari jarraipena ematea espero du, beti lehiakorra den Gironaren aurka, are gehiago bere etxean: "Ondo osatu da hasiera txar batetik, bere bertuteei balioa emanez eta talde ezaguna da normalean. Konfiantzaz ikusten dira. Gure helburua bihar irabaztea da. Beti da gure helburua. Jokalariak berreskuratzen ditugu eta sentsazio onak ematen dizkigu, baina hori zelaian islatu behar dugu".