2026ko hauteskundeak: nola abalatu hautagaitza bat

Athletic Clubeko Presidentetzarako eta gainerako Zuzendaritza-Batzorderako hautagai guztiek bazkide osoen %5en abala izan behar dute. Beraz, hauteskunde-deialdiarekin batera argitaratutako erroldaren arabera (41387 bazkide daude guztira), hautagaitza bakoitzak gutxienez 2070 abal beharko ditu.

Klubak, Estatutu berriak eta Hauteskunde-Erregelamendua onartu ondoren, maiatzaren 8rako aurreikusitako hauteskundeetara aurkezten diren hautagaitzak abalatzeko modua azaltzen die bazkideei.

Hauteskunde-Batzordeak beharrezko abalak lortzeko balizko hautagaitza bat onartzen duen bakoitzean, Klubak horren berri emango die ohar baten bidez webgune ofizialean eta posta elektronikoz hautesle-erroldako bazkideei.
 

• Nork abalatu dezake Athletic Clubeko Presidentetzarako eta Zuzendaritza-Batzorderako hautagaitza bat?

Hauteskundeetan botoa eman dezaketen bazkideak, hau da, hauteskunde deialdiaren egunean baldintza hauek betetzen dituztenak:

a) Adin nagusitasun zibila izatea.
b) Etenik gabeko urtebeteko antzinatasuna izatea.
c) Eskubide zibilen erabilera osoa izatea.
d) Hauteskundeak deitzen direnean bazkide oso izaera etenda ez izatea.
e) Hautesle-erroldan egotea.
f) Klubarekiko betebehar ekonomikoak egunean izatea.

• Noiz jotzen da baliozkotzat hautagaitza bat abala jaso ahal izateko?

Deialdia argitaratzen denetik aurrera, Presidentetzarako eta gainerako Zuzendaritza-Batzorderako hauteskundeetara aurkeztu nahi duten pertsonek Klubari jakinarazi ahal izango diote, abalak aurkezteko prozesua hasteko eskatuz.

Eskabideak aipatutako baldintzak betetzen baditu, Hauteskunde-Batzordeak abalak bitarteko telematikoen bidez lortzeko plataforma Klubaren webguneko "Bazkideen Txokoan" gaitzea aginduko du, eta abalak aurrez aurre aurkezten ere hasi ahal izango da.
 

• Nola abalatu dezaket?

1. MODU TELEMATIKOAN: 

Klubaren webguneko Bazkideen Txokoan, 'Hauteskundeak 2026 Presidentetzarako eta gainerako Zuzendaritza-Batzorderako /Abalak ematea' ataletik, 'HAUTAGAITZARAKO EKIMENA HAU ABALATU' botoia klikatuz eta eskaera berretsiz Txokoko prozesuen ohiko egiaztapen bikoitzaren bidez (SMS kodea), bazkidearen segurtasuna eta identifikazioa bermatzeko.

2. AURREZ AURRE: 


San Mameseko Bazkidearentzako Arreta bulegoan (20. atearen ondoan), inprimaki ofiziala aurkeztuta, ordutegi honetan:

* Astelehenetik ostegunera, 8: 00etatik 18:30era.
* Ostiraletan, 8: 00etatik 18:00etara.
* Asteburuan San Mamesen partidetan: larunbatetan, 10:00etatik 13:00etara.
* Apirilaren 2, 3, 4, 5 eta 6an bulegoa itxita egongo da.

 

• Zer epe daukat abalatzeko?

Hauteskunde-Erregelamenduaren 20.1 artikuluaren arabera, babes-abalak aurkeztu ahal izango zaizkie hautagaitza ofizial izendatzeko aurkezten direnei, deialdia iragarki-taula elektronikoan argitaratu eta hurrengo egunetik hasita hogeigarren egun naturaleko 18:00ak arte.

Hau da, apirilaren 18ko 18:00ak arte abalatu ahal izango duzu.
 

• Hautagai bat baino gehiago abalatu dezaket?

Bai, gehienez 2 hautagaitza abala ditzakezu. Abala, eman ondoren, ezeztaezina da.

 

• Hautagaitza bakoitzaren abalen kopurua publikoa al da?

Bai, Bazkideen Txokoan, ekimen bakoitzak eskatutako abalen gutxieneko kopurua gehi %5 lortu arte.

Une horretatik aurrera, hautagaitzarako ekimen horri ematen zaizkion abalak ez dira publikoak izango; dagokion ekimenari baino ez zaizkio emango.

Prozesuaren amaieran, Hauteskunde-Batzordeak lortutako abal-kopuruaren ziurtagiri ofizial bat emango dio hautagaitzarako ekimen bakoitzari. Hautagaitzarako ekimen bakoitza librea izango da Hauteskunde-Batzordeak ziurtatutako informazioa argitaratzeko.