Athletic Club - FC Badalona Women

Athletic Clubek denboraldiko lehen garaipena eskuratu du FC Badalona Women taldea mendean hartuta. Norgehiagokan, Víctor Martinek debuta egin du aulkian zuri-gorriekin, eta Amaia Iribarrenek, berriz, berdegunean. Kataluniako taldearen aurka nagusitu dira zuri-gorriak, eta hasiera ona zaleekin batera ospatu ahal izan dute; zaleek ez diote utzi euren taldeari bultzatzeari.

Partida hasi eta berehala iritsi da Badalonakoen gola. Irinak, desmarkean, Nanclares gainditu du. Golak ez ditu zuri-gorriak kikildu, eta euren partida-planari eutsi diote. Pinedok berdinketa lortu du aurkariaren arearen aurrealdean Valerok baloia pasa ondoren egindako jaurtiketa batekin. Athletic Clubek bigarrena ere egiteko aukera izan du, baina Cubedok gelditu egin du gola. Oguizak, gainera, area barruko ertzetik egindako jaurtiketa batekin langara jo du lehen zatiko azken minutuetan.

Víctor Martinen taldeak partidaren pisua izan du une oro. Bigarren zatian irauli da markagailua. Camposek jaurtiketa batekin ekin dio bigarren zatiari, baina baloia gutxigatik joan da kanpora. Nanclaresek, aldiz, ia ez du esku hartzerik izan. Kapitaina zelairatu da eta, beti bezala, garaiz agertu da, 2-1ekoa 71. minutuan iritsi da, baina Athletic Clubek erasokor jarraitu du, eta gol gehiagoren bila aritu da. Jone Amezagak, Pinedoren asistentzia bikain baten ondoren, aurkariaren atezainaren irteera saihestu eta baloia gainetik altxatu du, hirugarren gola sartuz. Golak festa giroa eragin du denboraldiaren estreinaldian.

Taldeak ez du sufritu azken minutuetan, eta garaipena ospatu ahal izan du talde-lanean oinarritutako jardun baten ondoren. Berdegunean, borroka eta ilusioa izan dira nagusi, eta taldearen izaeraren erakusgarri izan da. Orain, taldeak lehen irteeran du jarrita begirada. Datorren igandean izango da, Las Gaunasen, Logroño Uniteden aurka. Lehen hiru puntuak poltsikoan dituzte jada.