Athletic Club - Real Madrid

Athletic Clubek suspensez beteriko berdinketa lortu du Real Madrid indartsuaren aurka, Lezaman jokatutako Liga F-ko 10. jardunaldian. Zuri-gorriek aukera onak izan dituzte, ez dira kikildu eta, ahalegin horri esker, partida berdintzea lortu dute. Eva Navarrok aurretik jarri ditu zuriak, baina Ane Camposek, area barruan guztietan azkarrena izanda, markagailua berdindu du luzapenean.

Baloia jokoan jarri aurretik, Lezaman minutu bateko isilune hunkigarria egin da Jesús de Miguelen omenez. Hildako jokalariari egindako omenaldiak 9. minutuan izan du jarraipena, partida une batez gelditu denean.

Kirol arloari dagokionez, Athletic nortasun handiz zelairatu da, eta Clara Pinedok izan du partidako lehen aukera. Sara Ortegak ere berea izan du, baina Frohms atezainak ondo erantzun dio haren jaurtiketa indartsuari. Real Madrilek arriskua sortu du, baina ez du sentsazio hori Nanclaresen atearen aurkako jaurtiketetan gauzatu. Beerensteyn izan da gola sartzetik gertuen egon dena, baina haren burukada langaren gainetik joan da.

Bigarren zatian, markagailua hasierako berdinketarekin zegoela, talde zuriak aurrerapausoa eman du eta sakontasun handiagoz jokatzen hasi da. Linda Caicedoren abiadura baliatu nahi zuten abantaila lortzeko, baina zuri-gorrien defentsa erne ibili da haren lasterketak geldiarazteko. Kolonbiarrak berak izan du zurien aukerarik argiena, baina haren jaurtiketa zutoinaren ondotik kanpora joan da.

Pau Quesadak eta Víctor Martínek FVS sistemaren esku-hartzea eskatu dute balizko bi penalti berrikusteko, baina ez da bietako bat ere adierazi. Bi taldeek jokalari freskoak zelairatu dituzte, eta partidaren erritmoak bizia izaten jarraitu du. Azken minutuetan sartuta, Agotek bakarkako jokaldi bikaina egin du, baina Real Madrileko atezainak garaipenaren gola izan zitekeena eragotzi du.

85. minutuan iritsi da talde zuriaren gola. Eva Navarroren erdiraketa area barruan bote egin du modu maltzurrean, eta inork ezin izan du baloia atean sartzea eragotzi. Real Madrilek Lezamatik garaipena eramango zuela zirudienean, Ane Campos azkar ibili da area barruan, korner baten aldaratzea bereganatu eta baloia sareetara bidaltzeko.