Athletic Club - Deportivo Abanca

Athleticek beste porrot bat jaso du etxean. Lergaren neskek ezin izan dute Lezaman Deportivo Abanca taldearen aurka irabazi, eta duela bi aste Granada CF taldearen aurka izandako sentsazio bera utzi du.

Zuri-gorriak ez dira ondo sartu neurketara. 90 minutuetan oso deseroso ibili dira eta ez dute jokoa kontrolatzen jakin. Athleticen abagunerik argienak Vilariñoren zigilua izan duten bi ekintzetatik igaro dira. Nanclaresek, berriz, Ainhoaren gola saihestu du geldiketa bikain batekin. Daniela Agotek area barruan sartu eta Pereira behartu du bere jaurtiketa kornerrera bidaltzeko. Lehen zatia oso orekatua izan da, eta atsedenaldiaren ostean Athleticek markagailua irauli nahi izan du.

Argitasuna ez da egon zuri-gorrien alde, eta zehaztasun falta asko egon dira. Sara Ortegak baloi bat zutoinera bidali du eta hurrengo jokaldian, trantsizio azkar batean, Deporrek zuri-gorriak zigortu ditu. Ainhoa Marinek Nanclares gainditu du, eta ezin izan du 24. urtebetetzea poztasunez ospatu. Eta orduan partida zeinuz aldatu da, justu ekaitza bigarren zelaira iritsi denean. Coruñako neskek lerroak itxi dituzte eta Athleticen bultzadari ondo eutsi diote. Jone Amezagak, area erdian kontrolatu du baloia, eta bere jaurtiketa gora joan da.

Punturen bat lortzeko presak agertu dira, eta denbora agortzen ari zen. Nevadok izan du azkena, baina bere jaurtiketa kanpora joan da. Orain geldialdi luzea geratzen da, bi aste barru ligako azken bi jardunaldiak iritsi arte. Bi aurkari hauek, Dux Logroño (asteartean, hilak 26, 19:00etan, Las Gaunasen) eta Alhama CF taldea (oraindik data zehazteke) izango dira. Biek maila mantentzea dute jokoan.