Athletic Club - Logroño United

Athleticek beste berdinketa bat lortu du denboraldiaurreko hirugarren neurketan. Burgoseko Medina de Pomarren dagoen Jesus Maria Pereda zelaia athleticzalez bete da, giro ezin hobeaz gozatzeko. Partidak intentsitatea izan du eta, nahiz eta publikoa golik ikusi gabe geratu den, Athletic izan da abagune argienak izan dituen taldea.

Lehen zatia parekatua izan da. Maitane Vilariño izan da horietako baten protagonista; Amaia Iribarrenek, berriz, Olatz Santana izan du aurrean, denboraldi honetan Logroño Uniteden jokatzen duen Athleticeko atezain ohia. Bere aldetik, Errioxako taldeak ere bere aukera izan du zuzenean zutoinera jaurtitako korner batean. Oguizak ere korner batean buruz izan du bere aukera. Talde zuri-gorria nagusi izan da, baina golik gabe iritsi da partida atsedenaldira.

Aldageletatik bueltan, talde zuri-gorria gogotsu atera da partidaren bila. 61. minutuan Logroño United taldeko Annelieren kanporaketak Victor Martinen nesken nagusitasunari mesede egin dio. Talde errioxarrak ez du Eunate Astralaga ia urduritu eta, azken txanpan, Athleticek baloia sare barrura eraman ahal izan du hainbat aukeratan.

Aukera horietako bat Iraia Fernandez bigarren taldeko jokalariarentzat izan da, baina bere jaurtiketa kanpora joan da, zutoinetik oso gertu. Ondoren, Daniela Agotek erdiraketa ona atera du jokaldi on baten ostean, eta Izaro Torrontegi markagailua aldatzetik gertu egon da. Eta, azken minutuetan, Maddi Torre ere gola egiteko hurbil ibili da, alboko erdiraketa baten ostean.

Hala ere, partida golik gabe bukatu da eta taldea pozik amaitu du denboraldiaurre honetan egindako lanarekin, nahiz eta Athleticek oraindik ez duen golik sartzea lortu. Proiektu berriaren lana eta oinarriak egunez egun sendotzen ari dira Lezaman. Hurrengo proba larunbatean iritsiko da F Ligako beste aurkari baten aurka: Euskal Herria Kopako finalerdia izango da, Basarten, Amurrion, Deportivo Alavesen aurka, 18:30etik aurrera.