FC Barcelona - Juvenil División de Honor

Athleticek porrota jaso du Gazteen Errege Kopan. Adrian Estevek zuzentzen duen taldeak agur esan dio txapelketari Johan Cruyffen FC Barcelonaren aurka 2-1 galdu eta gero. Talde zuri-gorria Unax Urzaizen bitartez aurreratu zen lehen zatiaren amaieran, baina etxeko taldeak markagailua irauli zuen bi astindu azkarrekin bigarren zatia hasi eta berehala. 

Lehen zatia oso parekatua izan zen Estadi Johan Cruyffen, non bi taldeek aurkariaren atea bilatu zuten, arrisku handirik sortu gabe. Kanporaketa partida bakarrera jokatzeak taldeek zuhur jokatzea eragin zuen. Simon Garciak erantzun ona eman zion erasoei eta Unax Urzaizek, lehen berrogeita bost minutuetako azken txanpan, Athletic Club aurretik jarri zuen, behetik jaurtiketa on bat eginez.

Bigarren zatian, gazte zuri-gorriek kolpe ederra jaso zuten aurkako bi gol hartu ostean. Hugo Albak eta Arnau Pradasek, minutu batean, markagailua irauli zuten. Adrian Esteveren mutilak berdinketaren bila joan ziren arriskua sortuz, Pablo Martinezek langara bidalitako errematea abagune arriskutsuena izanda, baina ahalegina alferrik izan zen. Athletic Gazteen Errege Kopatik kanpo geratu da, ondo aritu eta merituzko maila eman ondoren.