Bilbao Athletic - Gimnàstic de Tarragona

Eraginkortasunak filiala kondenatu zuen Nasticen aurka. Tarragonako taldeak gol bihurtu zituen izan zituen aukera guztiak eta Bilbao Athleticek ezin izan zituen gol gehiago egin. Ondorioz, Jokin Aranbarrik zuzentzen duen taldearen porrota etorri zen (1-3). 

Bigarren talde zuri-gorria topera irten zen lehen golaren bila. Canalesek eta Varelak markagailua irekitzeko aukera argiak izan zituzten, baina kanpoko taldeak lortu zuen hori egitea. Entrenatzailearen hitzetan, bigarren taldea ez zen ondo aritu defentsako baloi-geldikako jokaldietan, eta horrela etorri zen lehen gola. Marc Fernandezek, markaz libre, Santos gainditu zuen 22. minutuan. Lehoikumeek norgehiagoka orekatzeko asmoz arraun egin zuten, baina atsedenaldia baino lehen Pablo Fernandezek berriro zigortu zituen, buruz, gazte zuri-gorriak.

Bilbao Athleticek amore eman beharrean, aldea murriztu zuen. Varelak Johanekoren erdiraketa on bat buruz bidali zuen ate barrura. Partida zegoen oraindik aurretik. Aukerak bata bestearen atzetik etorri ziren Varoko ate inguruan, baina Aranbarriren mutilek ezin izan zuten golik sartu. Taldeak erasora jo zuela, Gorostidik partida erabakita utzi zuen. Emaitza krudela Bilbao Athleticentzat, datorren ostiralean, azaroak 15, Osasuna Promesas hartuko duena (20:30ean).