CD Lugo - Bilbao Athletic

Porrot mingarria Bilbao Athleticentzat Anxo Carron. Jokin Aranbarriren mutilek ahalegin ikaragarria egin dute bigarren zati osoan partida berdindu nahian, bi gol ere sartu dituzte, baina ez da nahikoa izan markagailua iraultzeko. CD Lugoren gola Nico Renierok sartu du.

Bilbao Athletic ausart hasi da lehen zatian. Hala ere, Lugok Jokin Aranbarriren taldearen hasiera ona orekatzen jakin du, eta zuri-gorrien areara heltzeko arrisku handiko aukerak izan ditu. Zenbait hurbilketa egin eta gero Lugok lehen gola egin du, Nico Renierori esker, partidako 38. minutuan. Lehoikumeak markagailua iraultzeko zereginarekin joan dira aldageletara.

Bigarren 45 minutuak hasi eta berehala, Mikel Santosek bigarren gola saihestu du. Aldaik orain arteko abagunerik onena 57. minutuan izan du, defentsak area barruan zegoen baloi bat aprobetxatuz, baina Marc Martinezek berdinketa saihestu du geldiketa bikain batekin. Bilbao Athletic on batek aurkariaren ate ingurura zenbait aldiz iritsi da. Giftek, zelaian arrisku gehien duen jokalari zuri-gorriak, bere esku izan du 1-1ekoa, baina bere gola baliogabetuta geratu da jokoz kanpo zegoelako, epaileak FVS-an jokaldia berrikusi ostean. Amaieratik gertu, Giftek erdiraketa bikaina jarri du ezkerretik, baina Hierrok baloia ate gainetik bidali du. Hierrok berak aukera argia izan du area barruan, baina bere jaurtiketa kanpora joan da. Bitartean, Marc Martinezek bere taldea salbatu du behin baino gehiagotan.

Zuri-gorriek ez dute amore eman, eta 93. minutuan Hierroren gola heldu da, baina epaileak baliorik gabe utzi du berriro, jokoz kanpo zegoelako, FVS-an aztertu ondoren, eta bigarren zati osoan lehoikumeen ekina saririk gabe geratu da.