Bilbao Athletic - AD Mérida

Bilbao Athleticek puntu bat eskuratu du Meridaren aurka Lezaman. Elijah Giften gol eder bati esker zuri-gorriek markagailuan aurreratzea lortu dute, baina atsedenaldia heldu aurretik Parejak norgehiagoka berdindu du. Giftek berak birritan erabaki ahal izan du norgehiagoka, baina, azkenean, lehoikumeek zapore mikatza uzten duen berdinketarekin konformatu behar izan dute.

Bilbao Athleticen hasiera ona. Gift, partida hasi eta berehala, zelai erditik jaurtiketa batekin ezustekoa ematen saiatu da. Meridak minutu onak izan ditu, etxekoek ezarritako intentsitatea berdinduta. Hala ere, Giftek gol eder bat asmatu du 29. minutuan Bilbao Athletic markagailuan aurretik jartzeko. Hala ere, 10 minutu geroago, Parejak norgehiagoka berdindu du burukada on batekin.

Bigarren zatia lehenengoa bezala hasi da, oso berdindua eta bi taldeak euren jokoa inposatu nahian. Fran Beltranen mutilek aukera argiak izan dituzte, eta une batzuetan nagusi izan dira. Etxekoek ondo eutsi diete Meridaren erasoei. Giftek izan ditu bigarren zatiko abagunerik argienak, atezainaren aurrean biak; lehenengoa Adrianek gelditu du, eta bigarrena zutoinarekin topatu da. Azkenean, puntu banaketa Lezaman, eta Bilbao Athleticek Vigora bidaiatuko du Celta Fortuna bigarren sailkatuaren aurka jokatzeko.