Garitano: “Hemen ez du inork irabazten sufritu gabe”

“Garaipena merezi izan dugula uste dut, gaurkoagatik eta taldeak azken partidetan etxetik kanpo erakutsitako jarreragatik”. Gaizka Garitano pozik agertu da Athletic Clubek etxetik kanpo lortu duen lehen garaipenarekin. Osasunaren aurka 1-2 irabazi izanak ere hautsi egin du etxeko taldeak bere zelaian izan duen bolada bikaina: “Hemen sufritu gabe inork ez du irabazten, zerbaitegatik Osasunak 31 partida zeramatzan galdu gabe Sadarren. Ahal genuenean jokatzen jakin dugu, eta ezin izan dugunean sufritzen jakin dugu, berdinketaren ondoren besoak jaitsi gabe “.

Hamaikakoan izandako aldaketei ere egin die erreferentzia zuri-gorrien entrenatzaileak, partida aurretik eta partiduan zehar, sarritan ez ohikoak diren jokalariei buruz: “Bagenekien Oihan eta Unairi gasolina amaituko zitzaiela, eta fisikoagoa zen jendea beharko genuela amaieran. Kenanena ere ondo atera zaigu. Bera gureetako bat da eta daukadan profesionalik onenetakoa da. Hemen denon beharra dugu. Gaur oso zelai zailean, baja garrantzitsuak genituen, Muniain eta Raulena esaterako atsedenaldian, eta mutilek aurpegia eman dute “.