“Denok nahiko genuke Aduriz ondoan izatea”

Ibai Gomezek hedabideek telematikoki eta zuzenean egindako galderei erantzun die Lezamako prentsa aretoan.

Galderetako asko Aritz Adurizek futbola behin betiko uzteko hartutako erabakiaren ingurukoak izan dira. “Taldekide eta zale zuri-gorria bezala, zaila da albiste hau barneratzea. Athleticen historiaren  gorenean dagoen jokalari batez ari gara. Munduko mito bat da Aduriz”, esan du Ibaik.

Jokalari zuri-gorriaren ustez, Adurizek erretiratzeko izan duen modua “bidegabekoa” izan da, aldakako arazoengatik zigortuta baitago, eta, ondorioz, ezin izan du bere ibilbidearekin jarraitu: “Nahiago nuke titulu bat ospatu izan balu, baina egoerak galarazi egin du. Hori zen merezi zuena eta pena handia ematen digu. Eskerrak baino ezin dizkiogu eman, eta ziur nago Gabarra aterako dugula eta bertan egongo dela. Denborarekin are gehiago konturatuko gara Aduriz zer den Athleticentzat”.

Ibai Gomezek gogoan izan du Adurizekin Lezaman bat egin zuen lehen aldia: “Bere lehiarako gogo handiak harritu ninduen. Beti nahi izan du irabaztea, entrenamenduetan, partiduetan, danean. Ziur asko, inoiz izan dudan kiderik lehiakorrena izan da Aduriz, eta lehiakorra bezain pertsona ona da. Denok nahiko genuke Aduriz ondoan izatea”.

Gaia aldatuta, eta LaLigaren itzulerari buruz galdetuta, Ibaik “arrarotzat” jo du ikuslerik gabe jokatzearen sentsazioa: “Bundesligan ikusi dugu, oso arraroa da. Egia da, baita ere, denok jokatu izan dugula inoiz, futbola lanbide izan aurretik, partidaren bat ikuslerik gabe edo oso gutxirekin, eta hauek ere ahalik eta gehien gozatzen genuen. Gure lana da, baina baita gure hobbya ere; beraz,% 100 emango dugu”.