Andere Leguinak 2021era arte berritu du

Athletic Clubek eta Andere Leguinak (1989-03-17) akordioa lortu dute atezainak 2021eko ekainera arte jarraitzeko. Hortaz, atezain zuri-gorriak hamahirugarren denboraldiari ekingo dio klubean, bere dortsalaren zenbakiarekin bat eginez. Getxotarra beteranoetako bat da taldean, Erika Vazquezekin batera, eta Ainhoa Tirapu gabe beteko du bere lehen denboraldia bere bigarren aroan.

Andere Leguina 2003-2004 denboraldian iritsi zen Athletic Club “B” taldera 14 urterekin eta 2006ko azaroaren 25ean egin zuen debuta lehen taldearekin, 17 urte zituela. Lagunak taldearen aurkako ligako partida izan zen, eta Athleticek garaipena lortu zuen golik jaso gabe (3-0). Denboraldi horretan bertan lortu zuen bere bigarren liga titulua, 2003-2004 denboraldiko lehenengoaren ondoren. Atezaina 2012-2013 denboraldian atera zen Lezamatik (San Ignacio eta Madril CFF taldeetan jokatu zuen), eta 2016-2017 denboraldian itzuli zen talde zuri-gorrira.

“Urduritasuna faltako balitzait, zerbait galduko nuke”

Getxotarra bere bizkortasunagatik, erreflexuengatik eta oinekin duen joko onagatik nabarmentzen den atezaina da. Oso lehoi konprometitua da, eta urteak daramatza futbola eta telekomunikazioetako ingeniari lana uztartzen. “Athleticen hasi nintzenetik orain arte dena asko aldatu da, eta zorionez, onerako. Beti da ona Athleticen jarraitzea, hemen hazi naiz eta hemen hazten jarraituko dut, adina alde batera utzita. Sinatzen duzun bakoitzean, ilusionagarria izaten da beti, eta beste denboraldi bat hasten duzunean, beti da desberdina, eta urduritasuna sentitzen duzu barrutik; galduko banu, zerbait faltako litzaidake”, esan du Anderek.

Atezainaren ustez, datorren denboraldia zaila izango da, baina positibotzat jo du “bloke bera mantentzen jarraitzea, bajaren bat egongo den arren. Aurten pauso bat gehiago eman ahal izan dugula uste dut, eta hori geldialdia baino lehen ikusten zen. Espero dezagun denboraldi berrian lantzen ari garen guztia aprobetxatu ahal izatea Erreginaren Kopa bezalako gauza polit bat lortzeko eta gero denboraldi erregular bat egin ahal izateko, non goiko postuengatik borrokatuko dugun”.

Leguinak hitz eman du “buru-belarri entrenatuko” dela “hobetzen jarraitzeko eta nire taldekideak hobetzen saiatuko naiz. Gero jokatzearen saria lortzen bada, zoragarria izango litzateke, baina, batez ere, talde bat gara eta berarentzat lan egiten dugu”.