Athleticen Europako goleadak
Lehen taldea

Athleticen Europako goleadak

Gaur, duela 8 urte, Athleticek garaipen sendoa lortu zuen Helsinkiren aurka San Mamesen (6-0).

Athleticen Europako goleadak
Athleticen Europako goleadak
2020ko abu. 23a

Lehoiek Europan lortutako gol-kopururik handienak errepasatu ditugu. Gaur,, duela 8 urte, Athleticek bere goleadarik handienetako bat lortu zuen Europako txapelketako partida ofizial batean. 6-0 irabazi zuen HJK Helsinkiren aurka 2012-13ko Europa League-ko multzoen faserako txartela ematen zuen joaneko partidan. Athleticek kontinentean egindako goleadak gogoratu nahi izan ditugu, zuri-gorriek hiru gol edo gehiagoko aldearekin irabazi zituzten partiden emaitzak errepasatuz.

1976-77 denboraldian, bi markagailu handi lortu zituen UEFA Kopako finaleraino eramango zuen bidean. Final 1/32-etan, lehoiek 1-1 berdindu zuten joaneko partidan Ujpest Dozsaren aurka, eta ondoren 5-0 gainditu zuten talde hungariarra Dani Ruiz-Bazanen hat-trick batekin eta Txetxu Rojoren bi golei esker. Final 1/16-etan Basilea garaitu ondoren, Milan boteretsua Final-zortzirenetan zegoen zain: Urrezko baloia irabazi zuen Gianni Riverak eta Fabio Capellok jokatzen zuten talde hartan. 4-1 galdu zuen Milanek joaneko partida Dani eta Carlos Ruiz Herreroren bikotei esker. Athleticek 3-1 galdu zuen itzulerako partidan.

Hurrengo denboraldian, aurkari hungariar bera izan zen berriro ere lehoien biktima final-hamaseirenen itzuliko neurketan: joaneko partidako 2-0ekoa iraulita, 3-0ekoa lortu zuen Athleticek Daniren bi golei eta Fernando Tirapuren golari esker.

Joaneko partidako kontrako emaitza (2-0) iraulita ere, lehoiek Lech Poznan 4-0 gainditu zuten San Mamesen, 1983-84ko Europako Kopako 1/16ko itzulian, Andoni Goikoetxea, Miguel Angel Sola, Jose Maria Noriega eta Santi Urkiagaren golekin. Liverpoolek, hurrengo kanporaketan, Athletic txapelketatik kanporatu zuen.

Hurrengo geralekua, 1985-86 UEFA Kopako final 1/32etan da. Besiktas turkiarrak 4-1 galdu zuen Katedralean Urkiaga, Manu Sarabia eta Julio Salinasen bi golekin. Athleticek 0-1 irabazi zuen itzuliko partidan eta final-zortzirenetarako txartela eskuratu zuen geroago, bertan Portugaleko Sporting-en aurka galduta.

1994-95 denboraldian, lehoiak final 1/32ko itzuliko partidara iritsi ziren Anorthosisen aurkako joaneko partidako 2-0ekoa iraultzeko premiarekin. Julen Guerrero, Jon Andoni Goikoetxea eta Genar Andrinuaren golek 3-0ekoa jarri zuten markagailuan eta kanporaketa iraultzeko balio izan zuten. Parmak Athletic kanporatu zuen denboraldi hartan, final-zortzirenetan.

Europan Athleticen garaipenik handienari utziko diogu lekua orain. Lehoiek Standard de Lieja mendean hartu zuten etxetik kanpo (1-7) UEFA Kopako multzoen fasean (2004-05). Santi Ezquerroren hat-trickak eta Fran Yeste, Andoni Iraola, Asier del Horno eta Joseba Etxeberriaren golek Maurice Dufrasne futbol zelaia dardarka jarraitu zuten. Vienako Austriak Athletic kanporatu zuen final-hamaseirenetan.

Aurkari austriarraren aurkako mendekua 2009-2010 denboraldian heldu zen, Athletic Europa Ligako ‘ligaxkako’ bi partidetan nagusitu baitzen: 3-0 San Mamesen (Fernando Llorenteren bi gol eta Iker Muniainen gola) eta 0-3 Vienako Franz Horr Stadionen (Llorenteren bi gol eta Mikel San Joseren gola). Anderlechtek Athletic kanporatuko zuen geroago final-hamaseirenetan.

Aurretik aipatutako HJK Helsinkiren aurkako partidak kanporaketa erabakita utzi zuen (6-0) joaneko partidan Aritz Aduriz eta Markel Susaetaren bikoteekin eta Iñigo Perez eta Andoni Iraolaren golekin.

2015/16ko Europa Ligako multzoen faseko laugarren jardunaldiak 5-1eko emaitza utzi zigun FK Partizanen aurka. Ernesto Valverderen taldea nagusi izan zen Iñaki Williams (2), Beñat Etxebarria, Gorka Elustondo eta Adurizen golekin, aurrelariaren kamiseta zuri-gorriarekin lortu zuen 100. gola sartuz. Lehoiek txapelketa bikaina burutu zuten, Sevillak final-laurdenetan penaltietan kanporatu zituelarik.

2017-18ko Europa Leagueko atariko fasean, Athleticek ez zuen hutsik egin San Mamesen (3-0) eta Raul Garciaren bi golekin eta Adurizen batekin itxi zuen kanporaketa Dinamo Bukaresten aurka.

Golegile nagusiak Europako partida batean:
Europako golegile onenei dagokienez, Aduriz da gol gehien sartu dituen jokalaria Genken aurka sartutako bost golei esker. Bere atzetik, Artetxe (FC Portoren aurka 1956-57 denboraldian), Dani (Ujpest Dozsaren aurka 1976-77 denboraldian) eta Ezquerro (Standard Liejaren aurka 2004-05 denboraldian) geratu dira berdinduta.
1. Aritz Aduriz – 5 gol vs Genk (5-3 UEFA Europa ligan 2016-17an)
2. Jose Luis Artetxe – 3 gol vs FC Porto (3-1 1956-57 Europako Kopan)
3. Dani Ruiz-Bazan – 3 gol vs Ujpest Dozsa (5-0 UEFA Kopan 1976-77)
4. Santi Ezquerro – 3 gol vs Standard de Lieja (1-7 UEFA Kopan, 2004-05)