Villacampa: “Egokitzeko dugun gaitasuna izango da gakoa”

Gaur goizean, Angel Villacampak eta Ainhoa Morazak agerraldia egin dute Lezamako prentsa aretoan. Deportivo Abancaren aurka liga hasi eta 24 ordura, konfiantzaz eta ilusioz beteta agertu da entrenatzaile zuri-gorria: “Biharko norgehiagokari begira, hainbeste denbora lehiatu gabe egon ostean, hasteko gogo handia dugu. Gainera, Deporren aurka iaz arantzatxoa izan genuen 0-2 galdu genuelako bertan, orduan baino maila hobean egotea espero dugu. Denboraldi-aurrea luzea izan da eta bizi izan ditugun egoera guztietara egokitu gara; hor egongo da gakoa “. Coruñako taldeari dagokionez, entrenatzaileak gogorarazi du “gure gainetik postu bat geratu zela. Galiziarrak oso ondo indartu dira, oso ondo landutako taldea da. Teknikari bera eta iazko profil oso antzekoak dituzte”.

Lehoiek hainbat baja izan arren, Villacampa pozik agertu da Nekaneren itzulerarekin, zortzi hilabeteko bajaren ostean. “Ikusiko dugu zenbat denboraz lagundu diezagukeen, maila onean dagoelako, gainera”.

Helburuei dagokienez, entrenatzaileak esan du gertukoena “etxean garaipen bat lortzea” dela, “gure jende guztiarekin ez bada ere, baina bazkide batzuk gure ondoan egon ahal izatea beste pizgarri bat da. Epe ertain-luzera? Athleticen gaude, beti gora begiratuko dugu. Gatozen lekutik garaipen bat lortzea gozatzeko zerbait da”.

Moraza: “Pribilegio bat da guretzat zaleak harmailetan edukitzea”

Bestalde, Ainhoa Morazak esan duenez, “taldea konfiantzarekin dago eta zelairatzen den taldeak ondo egingo du. Denboraldi-aurrea luzeagoa izan da eta prestaketa desberdina. Ez genuen liga datarik eta gorputza ere erlaxatu daiteke. Zoritxarrez, lesio asko elkartu zaizkigu liga hasieratik gertu”.

Nazioarteko jokalaria, zalantzarik gabe, pozik dago bihar Lezaman publikoa egongo delako. “Edukiera txikia da, argi dago, baina bizi dugun egoera kontuan hartuta, jendea gu ikustera etortzea pribilegioa dela uste dut”. Ezarritako helburuei dagokienez, Morazak esan du “ahalik eta goren geratzea” dela.