“Puntuak partidaz partida lortzen dira”

Gizonezkoen lehen taldearen entrenamenduaren ostean, Jon Morcillok erantzun zituen Lezamako prentsa aretoan komunikabideek egindako galderak. Aurreko ezker hegalekoa Gaizka Garitanok zuzentzen duen lantaldera iritsi den azkenetarikoa da, baina pixkanaka lekua egiten ari da talde barruan: “Oso polita da eta ametsa egi bihurtu da. Bilbao Athleticetik igotzen zara eta beti zure erreferenteak izan diren jokalariekin zaude. Haiekin aldagela partekatzea, haien ondoan hobetzen duzula ikustea… Sinestezina da. Iritsi berria naiz, baina hemen ibilbide luzea egiteko helburua dut. Lanarekin, ahaleginarekin eta sakrifizioarekin, ziur gauzak orain arte bezala jarraituko dutela“.

LaLigako bederatzigarren jardunaldiko Real Valladoliden aurkako norgehiagokari dagokionez (igandean, 18:30ean), Morcillok adierazi zuen taldea buru-belarri dagoela garaipena lortzeko Jose Zorrillan: “Lanean eta irabazten jarraitu nahi dugu. Taldeak hurrengo partida irabazi nahi du. Ez dugu etorkizunerako helbururik ezarriko, partidaz partida joan behar dugu puntuak horrela lortzen direlako. Valladolidera joan behar dugu garaipena lortzeko. Hori da gure helburu bakarra: hurrengo partida irabaztea“.

Zornotzarra denboraldi honetan lehen taldera jauzi egin duten zenbait lehoikumeetako bat da, eta horrek harrotasunez betetzen du erdilari gaztea, Athletic bere harrobitik bizi dela kontuan hartuta: “Iristen zarenean eta taldekideek bere familiako bat bezala hartzen zaituztela ikusten duzunean, pisu handia kentzen dizu gainetik gauza guztietan. Harro egoteko modukoa da behetik gatozen jokalariek orain arte bezala maila eman ahal izatea, asko hobetu behar dugula jakinda“.