“Irabaziz gero, gora begira jarriko ginateke”

Gaizka Garitanok prentsa agerraldia egin du Lezaman bihar San Mamesen jokatuko den Athletic-Celta partidaren atarikoan. Prentsaurrekoa euskara hutsean egin du entrenatzaileak, Euskararen Nazioarteko Eguna dela eta.

Derioztarraren hitzetan, biharko partidan emaitza ona lortzea “oso garrantzitsua” da taldearentzat: “Guk azterketa bat gainditu behar dugu astero. Finalak balira bezala jokatzen ditugu partida guztiak eta nik argi daukat partida honek berebiziko garrantzia duela. Irabaziz gero, saltotxo bat emango genuke gora. Gainera, etxean jokatzen duzunean, partidak aurrera ateratzea ezinbestekoa da. Hil ala bizikoak dira neurketa hauek eta pentsaera horrekin goaz Celtaren aurka. Taldea konfiantzaz lepo dago”.

Aurkariaren inguruan, “erasoan duen kalitatea eta abiadura” nabarmendu du Garitanok, eta entrenatzaile berriarekin hartu duten joko-sistema berria hizpide izan du: “Celtak gorago estutzen du orain eta erasora jokalari askorekin iristen da. Joko estilo aldetik, Betisen antza gehiago du, baina hauek oso bolada onean datoz gurera”.

Urte bukaerarekin eta 2021aren hasierarekin datorren egutegi estuaz galdetuta, entrenatzaile zuri-gorriak “konfiantza osoa” agertu du bere jokalariengan: “Hiru egunetik behin jokatzen hasiko gara laster, eta aldaketak halabeharrez gertatuko dira partidatik partidara. Orain arte ere hala gertatu da gure taldean, eta berdegunera irten diren guztiek erakutsi dute euren lekua izan dezaketela. Jendea soberan dugu gauzak ondo egiteko, ez nau kezkatzen”.