undefined

Estatutuak Aldatzeko galdetegi orokorra

Estatutuak Aldatzeko galdetegi orokorra

Zabalik dago Txokoan azken inkesta, bazkideekin egindako partaidetza-mahaien emaitza, Estatutuak Aldatzeko Batzordeak prestatua

Athletic Clubeko Estatutuak Aldatzeko Batzordeak galdetegi bat prestatu du, eta bertan bazkideen kezka nagusiak biltzen dira. Joan den irailean egin ziren partaidetza-mahaien emaitza da galdetegi hori, eta aldez aurretik (maiatzean argitaratutako lehen galdetegi digitalean) jardunaldi horietan parte hartzeko prest agertu ziren bazkideekin egin zen.

Inkesta dagoeneko bete daiteke webguneko Bazkideen Txokotik (‘Estatutuen Erreforma’ atala) eta urtarrilaren 31ra arte egongo da indarrean.

Lehen galdeketa digital hartan, guztira, Athletic Clubeko 1.642 bazkidek parte hartu zuten. Batzordeak berriro eskatu die bazkideei galdetegi orokor honetan parte har dezatela, eta, behin ondorioak aztertu eta baloratu ondoren, eta [email protected] helbidera etengabe irekita dagoen postaren bidez jasotzen diren ekarpenak aztertu ondoren, Estatutuak Aldatzeko proposamena idazteko balio izango du. Ondoren, Ezohiko Batzar batean aurkeztu beharko da.

Batzordearen asmoa da erreforma-proposamen bat idaztea, bazkideak gehien kezkatzen dituzten gaiak bilduko dituena, Athletic Clubeko bazkide guztien eta guztientzako proposamena. Horregatik garrantzitsua da galdetegi honetan parte hartzea, posta elektronikoz jasotako ekarpenekin eta bildutako informazioa partekatzeko azken partaidetza-mahaiekin batera, Estatutu berrien azken proposamenaren aurrekoa izango baita.

Batzorde hori 2019ko Batzar Nagusian eratu zen, eta Gorka Cubes eta Josu Arteta (konpromisarioek aukeratuak), Ana Urquijo eta Aner Uriarte (Zuzendaritza-Batzordeak izendatuak) bazkideek osatzen dute. Batzordekide horiek abenduaren 27an egingo dute agerraldia Athletic Cluben 2020ko Ohiko Batzar Nagusian, prozesuan izandako aurrerapenen eta prozesuaren hurrengo urratsen berri emateko.