Helburua: bolada onarekin eta lidergoarekin jarraitzea

Urriaren 25etik galdu gabe eta bere azpitaldeko lider gisa. Horrela egingo dio aurre Bilbao Athleticek gaur, igandea, 12:00etatik aurrera. Zuri-gorriek Alaves Bren aurka neurtuko dituzte indarrak Ibaian, Bigarren B Mailako II. multzoko A azpitaldeko hamaseigarren jardunaldiko partidan. Neurketa, ateak itxita, zuzenean jarraitu ahal izango da gure Youtubeko kanal ofizialetik.

Lehoikumeak, sailkapenaren gorenean 27 punturekin, oso dinamika onean daude. Jarraian galdu gabeko hamabi partidetatik haratago, zuri-gorriek bi garaipen lortu dituzte azken bi partidetan. Gainera, sailkapeneko lehen postuetan dagoen SD Amorebietaren aurkako azken garaipenean, Joseba Etxeberriaren taldeak urdinen hasierako gola iraultzea lortu zuen, Urritxen partida 2 eta 3 irabaziz, orain arte talde bakar batek denboraldi honetan lortu ez zuena.

Azken hamabi partidetan zazpi garaipen eta bost berdinketa lortuta, Bilbao Athletic hiru puntuak lortzen saiatuko da Lezamatik urrun jarraian jokatuko duen bigarren partidan. Aurrean izango duen aurkaria, Alavesen bigarren taldea, entrenatzailea aldatu du aste honetan eta orain Raul Llonak zuzentzen du taldea. Zuri-gorrien eta babazorroen arteko azken norgehiagokan, txapelketako bosgarren jardunaldian Lezaman jokatutako neurketan, talde zuri-gorriak 2 eta 0 irabazi zuen, Artolak eta Cabok sartutako golei esker. Hona hemen partida hartako laburpena.