Lehoiek bolada ona luzatu nahi dute Sevillan

Joan den asteburuko etenaldiaren ostean, Athletic ligara bueltatuko da berriro. Lehoiek, sailkapeneko hirugarren postuan eta 21 puntutik 16 lortuta, denboraldi hasiera bikaina luzatu nahi dute Betisen aurka. Gainera, Iraia Iturregiren taldeak ez daki zer den etxetik kanpo galtzea; hiru garaipen eta berdinketa bat lortu ditu Lezamatik urrun. Sevillako taldearen aurkako norgehiagoka Primera Iberdrolako zortzigarren jardunaldiari dagokio eta bihar, igandea, jokatuko da 11: 00etatik aurrera, Luis del Sol Kirol Hirian. Belar naturaleko Felipe del Valle futbol zelaian jokatu behar zen partida, baina belarra egokitzeko lanengatik belar artifizialeko instalazio horretara itzuli behar izango dute.

Hala ere, Athletic Clubi ez zaio guztiz gaizki eman Luis del Solen jokatzea. Bertan ligan jokatutako lau norgehiagoketan bi garaipen (biak Erika Vazquezen goleekin 1-1eko berkinketa hausteko) eta bi berdinketa lortu ditu. 2016-17tik ez zekiten, beraz, Sevillan Betisen aurka zer galdu. Haatik, joan den denboraldian, Iturregiren taldeak galdu egin zuen Felipe del Vallen. Neurketa azken minutiko porrot batekin amaitu zen eta hain mingarria izanda, inflexio puntua izan zen taldearentzat otsailean.

Betis, iazko sufrimendutik aldendu nahi duen taldea

Real Betisi buruz hitz egitea iaz entrenatzaile aldaketa eta urte osoan zehar zailtasunak izan zituen talde bati buruz hitz egitea da. Angela Sosa, Altuve eta Mari Pazen fitxaketek ilusioa piztu zuten, baina taldeak estutasunak izan zituen sailkapenean. Amoros buru duela, berdeguneak joko bertikala egiten du eta erasoko erreferentzia handienetako bat izaten jarraitzen du Sosak. Sevillarrak lau gol lortu ditu orain arte.

Aurreko jardunaldian talde andaluziarrak 1-2 irabazi zion SD Eibarri Unben eta bederatzigarren postuan dago zortzi punturekin. Bestalde, lehoiek 2-1 gainditu zuten Villarreal Lezaman, eta etxetik kanpo galdu gabe jarraitu nahi dute, une gozoaz gozatzeko.