“Ez nintzateke inoiz lasaituko Rayoren kontra”

Iraia Iturregik agerraldia egin du gaur goizean Lezaman, bihar Madrilera abiatu aurretik, Ligako hamargarren jardunaldia jokatzeko. Athleticek Rayo Vallecanoren aurka jokatuko du, igandean, 12:00etan, talde madrildarraren Kirol Hirian. Loiutarrak Erika Vazquezen baja baieztatu du, giharretako arazoak jota, Levanteren aurkako partidan ez zuen jokatu. Bestalde, Nekane Diez zalantza da Vallecasera bidaiatzeko.

Talde granotaren aurka galdu ostean, Iturregik esan du norgehiagokatik taldea sendotuta atera dela. “Sailkapenari begiratzen diozu eta taldea Champions-etik bi puntura dago. Talde onenekin ari gara borrokan eta partida guztietan lehiatzen, Betisen aurkako lehen zatian izan ezik. Partida hartatik ikasi genuen. Bihar Betisen antzeko zelai batera goaz, zelai deseroso batera, non baloiak bote asko egiten duen. Aurkariak puntuak lortzeko beharra dauka. Etsaitasunezko ingurune bat aurkituko dugu. Ez da batere erraza zelai horretan irabaztea eta gauzatzeak plus mentala emango liguke”.

“Rayo une gogorren aurrean hazten da”

Entrenatzaile zurigorriak Rayo Vallecanoren jokalariei babesa emateko aprobetxatu du lan egoera, eta talde madrildarraren esentzia borrokalaria azpimarratu du. “Rayo ezbeharretan hazten den taldea da. Bere zaletuek ere hori transmititzen dute, une zailetan inoiz amore ematen ez duen jendea da. Nik ez dut zalantzarik, emakumezkoen Lehen Mailan inork nahi ez dituen lan egoeretan egon arren, maila salbatzen saiatuko dira. Inoiz lasaituko ez nintzatekeen aurkaria da”.

Kirol arloari dagokionez, Iturregik erasorako duen ahalmena azpimarratu du, bere talde-jokoarekin eta jokalari trebeekin, baina bere ahuleziez ere ohartarazi du: Defentsako maila. Hala ere, talde madrildarrak 5 gol sartu eta 20 jaso ditu. “Partida egokia izan daiteke bi porrotak atzean utzi, puntuak lortu eta taldea zelai zail batean ondo lehiatzen ikusteko“.