“Pozik gaude partidei aurre egiteko moduarekin”

Marcelino Garcia Toralen bajaren ondorioz, COVID-19a dela eta, Ruben Uriak ordezkatuko du Sadarreko aulkian. Bigarren entrenatzaile zuri-gorriak, Lezamako prentsa aretotik, komunikabideen galderei erantzun zien urteko lehen partidaren atarian. LaLigako 19. jardunaldian Athleticek Osasunaren zelaia bisitatuko du eta pandemiak argi eta garbi baldintzatzen du neurketa hau: “Zalantza horrekin ari gara lanean. Ez gaitu gehiegi nahastu entrenamenduei dagokienez, horretarako jokalariak genituelako eta Bilbao Athleticeko jokalari batzuk ere gurekin etorri direlako, baina egia da egoera ez dela erosoa. Egun hauetan, klub handi honen aukerei esker, Marcelino etengabe egon da guztiokin harremanetan. Bihar antzekoa egiten saiatuko gara. Berak beste ikuspegi bat izango du“.

Derbiari dagokionez, Ruben Uriak oso orekatua izatea aurreikusten du eta bere jokalariak ondo ikusten ditu: “Gu pozik gaude taldeak partidei aurre egiteko moduarekin eta gaur arte jokatu dugun erarekin, salbuespenen bat izan ezik. Egia da Osasunak ez duela emaitza onik izan etxean, eta haiek eta guk puntu gehiago izan beharko genituzke. Badakigu zer aurkituko dugun eta partidari intentsitate handiz aurre egin behar diogu. LaLigan berdintasun handia dago, eta arerio oso bertikala izango dugu aurrean“.

Azkenik, honela aztertu zuen aurretik daukaten egutegia. Ez dute etxean jokatuko hilabete osoan zehar: “Arraroa egiten da, etxean jokatzea gustatzen zaigulako. Gainera, pena da bihar zelaian egongo ziren 600 zale horien babesa ez izatea. Egutegia datorren modukoa da eta hilabete polita dugu aurretik. Hiru lehiaketa dauzkagu eta baikortasunez egin behar zaie aurre“.