“Garaipena merezi izan dugu”

“Nagusi izan gara eta garaipena merezi izan dugu”. Marcelino Garcia Toral “harro” agertu da komunikabideen aurrean Atletico Madrid mendean hartu eta gero, 2022ko Superkopako finalerdian. Athleticen laugarren finala izango da urtebetean: “Partida oso serioa jokatu dugula uste dut, hasieratik. Orokorrean partida oso parekatua izan da, Atletico aurretik jarri da geldikako baloi batean eta gu erasoko estrategiaren bidez markagailua iraultzeko gai izan gara. Beste final bat jokatuko dugu. Izugarrizko zortea daukat Athletici entrenatzeagatik eta entrenatzen ditudan futbolariei esker lau final jokatuko ditudalako. Meritu handia du talde honek”.

Aurkako gol bat irauli eta maila bikaina erakutsi ondoren, Athletic Superkopako titulua berresteko lehiatuko da: “Aurkako golaren ondoren ondo erreakzionatu dugu, eta horrek bultzada eman digu, oso ondo sartu diren aldaketekin batera, indarberritzeko. Emaitza alde batera utzita, argi utzi nahi dut zein harro nagoen futbolari hauek zuzentzeaz. Taldearen maila goraipatzekoa da, urtebetean lau final jokatzeko gai izango baita. Orain arte ez dago talde askoren eskura”.

Igandeko finalean (19:30ean) Real Madrid LaLigako liderraren zain dago. Athletic, antza, ez da faboritoa izango, baina lehoiengan eraginik ez du izango: “Guri ez zaigu axola hori, kontrakoa esatea errealitatetik aldentzea da. Hiru boteretsuen aurka jokatu dugu. Guretzat harro egoteko modukoa da titulu hau defendatzea eta hemen egotea beste batzuek egon nahi luketen tokian, baina Athletic dago hiru erraldoi hauen ondoan. Orain beste Superkopa bat irabazten saiatuko gara. Ilusioz gainezka gaude”.