“Taldea nabarmen hobetzen ari da”

Marcelino Garcia Toralek komunikabideen galderak erantzun zituen Athletic Clubek Elche CF-ren aurka 2-1 San Mamesen garaitu ostean. Lasaiago irabazteko aukera izan zuten arren, orokorrean pozik agertu zen bere jokalariek egindako lanarekin: “Gure taldea horrela jokatzen ikusten dugunean, ezin zara haserre egon. Agian zortea falta izan zaigu lehen zatia borobiltzeko. Beti partidak erabakita uztea nahi duzu, baina ezin izan dugu, eta 1-0ekoa emaitza zaila da, edozein akats eginez gero aurkariak zigortu zaitzakeelako. Askoz gehiago gustatuko litzaidake 2-0 amaitzea. Azkenaldian kosta egiten zaigu golik ez jasotzea, eta pena da aurkariak hain gutxirekin hainbeste lortzea. Orokorrean lan ona egin dugu“.

Entrenatzaile zuri-gorriak ere aitortu zuen bere taldea maila hobea ematen ari dela jardunaldiek aurrera egin ahala: “Aspalditik esaten ari naiz oso ondo gaudela. Gaur oso antolaketa ona izan dugu eta horrek ekimena eramatea ahalbidetu digu. Taldea nabarmen hobetzen ari da“.