Jose Angel Iribarri omenaldia bere 80. urtebetetzean

Jose Angel Iribarrek, futbolaren historiako atezainik onenetako batek, 80 urte beteko ditu datorren martxoaren 1ean. Zifra biribila da markatutako urte batean: Athletic Cluben 125. urteurrenekoa, bere bihotzeko taldea. Bi efemeride horiek, elkarrekin, aparteko ospakizuna merezi dute.

Horregatik, Athletic Clubek, bere 125. urteurrenean eta Iribarren 80. urtebetetzean, gutuna bidali die hitzartutako 167 klubei, euren atezainak martxoko lehen jardunaldian beltzez janzteko gonbitea eginez, ostirala 3 eta igandea 5 bitartean. Gainera, Jose Angel Iribar aintzat hartu nahi duten klub eta atezain guztiei zabaldutako proposamena da.

Iribar, Txopo izenaz ezaguna izan dena bere irudi soil eta luzeagatik, Athleticen historian partida gehien jokatu dituen futbolaria da, 18 denboralditan zehar 614 partida, baina bere helmena eta ibilbidea internazionalak dira. Makal bat, sustraiak bere lurrean sakon dituena, baina hain garaia eta bikaina, non bere itzala mundu osoan zehar proiektatzen baita. Hori dela medio, kontaezinak dira Iribarrek bere ibilbidean zehar jaso dituen laudorioak eta esker onak: Dino Zoffenak, Ricardo Zamorarenak eta baita Armiarma Beltza goitizena zuen Lev Yashin mitikoarenak ere; hain zuzen ere, Iribarrek kamiseta ilunez janzteko ohitura atezain honengatik hartu zuen.

Bitxikeria batek bikain islatzen du Jose Angel Iribarren irudiaren dimentsio unibertsala: Akis Ikonomopoulos Panathinaikoseko atezaina eta Greziako futbolaren historiako atezainik onenetakoak, 1971ko Europako Kopako finalean Iribarren elastikoa jantzi zuen, Wembleyn Cruyffeko Ajaxen aurka jokatutakoa.

#Iribar80 traola

Hitzartutako klubei zuzendutako gonbidapenaz gain, Athletic Clubek #Iribar80 traola sortu du, edozein klubek eta munduko edozein atezainek omenaldiarekin bat egin dezaten, lehiaketaren maila edo lekua edozein izanik ere. Helburua da ate bat zabalik uztea ahalik eta talde eta atezain gehienek bat egin dezaten ospakizunarekin.

Horiek horrela, #Iribar80 traola ere gonbidapena da, guztion artean futbolari errepikaezin eta unibertsal honi omenaldi paregabea egin diezaiogun. #Iribar80 traolak martxoko lehen jardunaldian ere aktibo jarraituko du, horretarako beltzez janzten direnen argazkiekin batera, lekua eta lehiaketa alde batera utzita. Elkarrekin, urrunean, futbolaren mito bizia den atezain honi eskainitako urtebetetze berezia ospatzea da asmoa: Jose Angel Iribar.