Wandara bisita bi asteko geldialdia heldu baino lehen

Liga F-ko 19. jardunaldia erronka zailarekin dator lehoien. Igandean, otsailak 12, 12:00etatik aurrera, Athletic Clubek eta Atletico de Madridek indarrak neurtuko dituzte Wanda Kirol Zentroan. Emakumezkoen futboleko beste klasiko handi bat. Iraia Iturregik zuzentzen duen taldeak emaitzen bolada aldatu eta sentsazio onenekin iritsi behar du martxoaren 9an CA Osasunaren aurka jokatuko duen Erreginaren Kopako final-laurdenetako partidara.

Atletico de Madrid lehen hiru postuetara gerturatzen saiatzen ari da denboraldi honetan, baina oraingoz ez da lortzen ari. Egia da lehen hiru sailkatuek (FC Barcelona, Real Madrid eta Levante UD) ez dutela oina azeleragailutik altxatu eta ondorioz madrildarrak laugarren postuan daude 11 puntura. Denboraldi honetan, talde koltxoneroak Oscar Fernandez ordezkatu zuen eta etxeko gizon bat aukeratu zuen, Manolo Cano. Joaneko partidan, Atletico de Madrid nagusitu zen lehoien aurka (1-4), Sheilak, Lucia Moralek eta Ludmilak, birritan, sartutako golei esker. Marta Unzuek markagailua ireki zuen zuri-gorrientzat. Partida berdinduta egon zen atsedenaldira arte, baina bisitariek neurketa hautsi zuten bigarren zatian.

Norgehiagoka zaila izango da, eta Athletic Clubek oso kontzentratuta egon beharko du talde koltxoneroaren erasoak saihesteko, aurrealdean jokalari azkarrak eta trebeak baititu, hala nola Ludmila bera, Ajibade, Marta Cardona, Barbara Latorre edo Banini (guztiak internazionalak).

Iturregik iragan abendutik Wanda Kirol Zentroko hitzordurako zelaietan agertu gabe zeramatzaten bi jokalari berreskuratu ditu. Ane Azkona aurrelaria eta Marta Unzue erdilaria dira, baina, bestalde, Nekane galdu du soleoko giharretako lesioagatik. Zuri-gorriek azken ahalegina egin beharko dute Liga F-ko geldialdiaren aurretik. Bertan kontzentratuta geratuko dira Espainiako selekzioarekin (absolutua, 23 urtez azpikoa eta 19 urtez azpikoa) Athletic Clubeko bederatzi jokalari.