Athleticek "Pasa Baloia, Neska" proiektua sustatuko du

Gaur goizean, "Pasa Baloia, neska" proiektua aurkeztu da San Mamesen, datorren ostiralean, martxoak 24, Athletic Club - Sevilla FC partida jokatuko den eszenatoki berean. Bizkaiko Foru Aldundiak, Athletic Clubek eta Bizkaiko Futbol Federazioak batera bultzatzen duten ekimena da, lurraldeko emakumezkoen oinarrizko futbolaren eta eskola-futbolaren egitura sustatzeko eta ikusarazteko.

Ekitaldian izan dira Lorea Bilbao Euskara, Kultura eta Kirol diputatua; Xabi Arrieta, Athletic Clubeko emakumezkoen saileko futboleko zuzendaria; Lourdes Zorrozua, Bizkaia Futbol Federazioko zuzendaritzako kidea eta Gari Fullaondo, proiektuaren zuzendaria.

Hasiera honen bidez, Athletic Clubek Bizkaiko emakumezkoen oinarrizko futbolaren egitura indartu nahi du, bere esperientzia eta ezagutzak klubekin partekatuz. Athleticeko emakumezkoen futboleko zuzendaria den Xabi Arrietak azpimarratu duenez, "proiektu hau bat dator Klubaren ildo estrategikoekin, Bizkaiko emakumezkoen kluben sustapenari dagokionez. Athleticek ardura bat dauka lurraldean futbolean aritzen diren neska guztiekin, neska bakoitza altxor bat da".

"Pasa baloia, neska"

Ekimena Bizkaiko eskola eta federatu mailako emakumezkoen futbolaren masa sozial osoari zuzenduta dago. Klubetako eta kirol-erakundeetako jokalariek, teknikariek, kudeatzaileek, senitartekoek eta emakumezkoen futboleko beste agente batzuek beren kirol-lana optimizatzen lagunduko duen tresna eskuratu ahal izango dute.

Horrela, "Pasa Baloia, Neska" programak Bizkaiko emakumezkoen futbolaren egitura osoa ahalik eta ondoen garatzea ahalbidetuko du eta, horretarako, klubei eta erakundeei honako zerbitzu hauek eskainiko die: emakumeen futbolean metodologia espezifikoa, kirol-kudeaketarako aplikazio teknologikoak, teknikarien eta kudeatzaileen egitura osorako prestakuntza espezifikoa eta aholkularitza integral pertsonalizatuko proiektua.

Athletic Clubek, Bizkaiko emakumezkoen futbolaren erreferente nagusi gisa, Bizkaiko oinarrizko futboleko kluben eta erakundeen esku jarriko du bere kapital teknikoa eta antolaketa-kapitala, kategoria goiztiarrenetan modalitate honen praktikari balio erantsia emateko helburuarekin.