"Niretzat, LaLigako derbirik onena da"

Ernesto Valverde Athletic Clubeko entrenatzaileak agerraldia egin du lehoien denboraldi honetako etxetik kanpoko azken derbiaren atarian. Bihar gaueko 21:00etatik aurrera Realari bisita egingo diote Reale Arenan, zalantzarik gabe neurketa berezia dena gure futbolean: "Partida motibagarria da, polita eta jokatu nahi duguna. Niretzat, LaLigako derbirik onena da. Mundu guztia elkarrekin dagoela eta bere taldea animatzen gozatzen duela ikusten dut. Giro aparta egongo da beti bezala. Egia da oso jarraian datorrela eta esfortzu handia egin genuela, hamar futbolarirekin denbora asko jokatuta , baina fresko eta gure mailan egon behar dugu".

Teknikari zuri-gorriaren aburuz, arrakastaren gakoa idiosinkrasia ez aldatzean datza: "Talde bakoitza, aurkariari gailendu nahian, egin ohi duenari leial izango zaiola uste dut. Iaz bi norgehiagokak oso lehiatuak izan ziren. Bakoitzak berea eraman zuen. Oso posizio onean iristen gara, baina oraindik oso goiz da. Reala Txapeldunen Liga jokatzen ari bada, zerbaitegatik da, eta neurketa latzagoetan garaipenak ateratzeko ofizioa ere badu. Orain berdinduta gaude, baina inoiz ez dago faborito argirik, lehiakortasun-puntu bat gehigarri bat dagoelako, beti osasuntsua, eta horrek ezberdintasunak ez nabaritzea eragiten du".